गैंडाकोट १४ अमरापुरीस्थित भागर र नगर टाँडी जोड्ने झन्डै १०० मिटर लामो भाइरल झोलुङ्गे पुल निर्माण भएपछि पर्यटकको आकर्षण बढेको छ ।
बि.स.२०६४ सालमा निर्माण भएको उक्त पुल (युएनडिपी)को सहयोगमा निर्माण गरिएको हो । झन्डै २० लाखको लागतमा बनेको उक्त पुल वारीपारी मनोरम प्राकृतिक दृश्यहरु रहेका छन् ।
दिनमा सयौंको संख्यामा आउने स्वदेशी पर्यटकहरुले मनोरम प्राकृतिक दृश्यसंगै, बराह, शङ्खदेबी, पञ्चबली गोरखनाथ लगायतका मन्दिर र अर्गानिक कृषि क्षेत्रको समेत अबलोकन गर्न सक्नेछन् ।
घुम्न आउने पर्यटकहरुका लागि प्यास मेटाउन प्रकृतिले नै दिएको धारा तीनधारे मुलपानी (कुवा) सोही पुल नजिकै रहेको स्थानीय मेघनाथ सापकोटाले बताउनुभयो ।
परापूर्वकालदेखि पू्र्खाहरुले समेत सोही कुवाको पानी पिउदै आइरहेको सापकोटाको भनाइ छ । तारानगर खानेपानी समूहले उपयोग गर्दै आइरहेको उक्त पानी अहिले झन्डै २०० घरधुरीमा बितरण भएको छ ।
भागर र नगर टाँढीमा दुईतर्फी व्यवस्थित बाटो निर्माण हुन सकेको खण्डमा यहाँ उत्पादन भएका अन्नबाली र तरकारीबालीले राम्रो बजार पाउने स्थानीय मेघनाथ सापकोटाले बताउनुभयो ।
उता, वर्षातको समयमा बाढीपहिरोबाट हुन सक्ने सम्भावित जोखिमलाई मध्यनजरगर्दै नगरपालिकाले खोल्साखोल्सी भएको क्षेत्रमा तटबन्धनको योजना अगाडि बढाएको छ ।
भौगोलिक र प्राकृतिक भू-बनोटका हिसाबले समेत बिकट र पहाडी क्षेत्र भएकाले केही क्षेत्रमा प्रयाप्त खानेपानी र सिचाइको समेत अभाव रहँदै आएको छ ।