विश्व हिन्दु महासंघ चितवनले बङ्गलादेशमा जारी हिन्दु तथा बौद्ध धर्मावलम्बीहरुमाथि भएको हिंसाको बिरुद्धमा आज कोणसभाद्वारा बिरोध जनाएको छ ।
भरतपुरको चौबीस कोठीमा सयौंको संख्यामा विश्वहिन्दु युवासंघले बङ्गलादेशमा भइरहेको धार्मिकद्वन्दप्रति बिरोध जनाएको हो ।
विश्व हिन्दु महासंघ नेपाल, चितवनका अध्यक्ष प्रेम गैरेको अध्यक्षतामा भएको कार्यक्रममा शेषनारायण मन्दिर क्षेत्रपुरका मठाधिस पुज्य गुरु पदभानाचार्यको प्रमुख आतिथ्यता रहेको थियो ।
कार्यक्रममा बोल्नुहुँदै गुरु पदभानाचार्यले विश्व जगतका हिन्दु अब एक हुनुपर्ने बेला आएको बताउनुभयो । बङ्गलादेशमा मिलेर बसेको सनातनी हिन्दु धर्ममाथि भइरहेका हत्याहिंसा र ज्यादतीका बारेमा क्रूर युद्ध हुँदा समेत नेपाल सरकार निदाएर बसेको टिप्पणी गर्नुभयो ।
यसैगरी बिरोधसभामा सहभागी हुँदै चितवन क्षेत्र नं. ३ (क) का बागमती प्रदेशसभा सदस्य ज्ञानुजङ लामाले बङ्गलादेशमा भइरहेको धार्मिक द्वन्द्वप्रति दुख व्यक्त गर्दै लामाले देशभरका मानवअधिकारकर्मीहरु अझैसम्म पनि मुकदर्शक बनेर हेरिरहेको बताउनुभयो ।
बहुसंख्यक हिन्दुराज्य भएको मुलुकलाई जबर्जस्ती धर्मनिरपेक्षता बनाएर राज्यले ठूलो गल्ती गरेको लामाको भनाइ छ । बङ्गलादेशमा हिन्दु समुदायमाथि भइरहेको धार्मिक युद्धमा समेत नेपालले बिज्ञप्तीसम्म निकाल्न नसक्नु झनै ठूलो गल्ती भएको बताउनुभयो ।
उता विश्व हिन्दु महासंघ नेपाल, चितवनका अध्यक्ष प्रेम गैरेले बङ्गलादेशमा भएको साम्प्रदायिक युद्धको खतरा नेपाल र भारतमापनि बढ्न सक्ने भन्दै ठूलो हुलहुज्जतमा क्रूर तानाशाही भित्रिन सक्ने खतरा बढेको बताउनुभएको छ ।
नेपाल र छिमेकी मुलुक भारतले समेत सिमानाकामा थप कडाई गर्नुपर्ने गैरेले बताउनुभयो । जवसम्म देशमा धार्मिक सद्भाव कायम गर्न सकिदैन तवसम्म हिंसात्मक घटनाको अन्त्य हुन नसक्ने भन्दै गैरेले तत्काल संयुक्त राष्ट्र संघले समेत धार्मिक एकता कायम गराउनुपर्नेमा जोड दिनुभयो ।
भरतपुरको चौबीस कोठीमा गरिएको कोणसभामा ब्राहमण समाज, दशनामी, ठकुरी समाज र श्री बैष्णब समाजको समेत उक्त कोणसभामा एक्यवद्धता रहेको थियो ।
सयौंको संख्यामा रहेका हिन्दुवादीहरुले सनातनीहरुमाथिको आक्रमण बन्द गर, संयुक्त राष्ट्र संघ कहाँ छ, बङ्गलादेशमा हिन्दु र बौद्धधर्म माथि भएको धार्मिक द्वन्द तत्काल बन्द गर, जस्ता प्लेकार्ड सहित नाराबाजी गरेका थिए ।