चितवन क्षेत्र नं. ३ का प्रतिनिधिसभा सदस्य एवं पूर्वमन्त्री बिक्रम पाण्डेले चुनावमा जनता समक्ष बोलेका कुरा पुरा नगरेको आरोप लागेको छ ।
उहाँले निर्वाचनमा बिजयी हुँदा प्रचण्डलाई लक्षित गरि निकुञ्जको बाटोमा आकाशे पुल नबनेपनि आफूले कालोपत्रे गरेरै छाड्ने प्रतिबद्धता जनाउनुभएको थियो ।
सम्बोधनका क्रममा उहाँले हालसम्मका अधुरा बिकास निर्माणका कार्यमा तत्काल तदारुकता देखाउने आश्वासन समेत दिलाउनुभएको थियो । निकुञ्ज ऐन २०२९ का कारण यसबाट सिर्जित समस्याले माडीबासी प्रताडित हुँदै आएका छन् ।
निकुञ्जको खुल्ला सिमानाका कारण जंगली जनावरहरु मानवबस्तीमा पसेर विध्वंस मच्चाउने तथा धनजनको क्षति पुर्याउने गरेको यहाँका स्थानीयबासीहरु बताउँछन् ।
मानव र बन्यजन्तुबीचको द्वन्द्वकै कारण निकुञ्ज प्रशासनबाट समेत नागरिकहरुले बेलाबखतमा ज्यादती भोग्नुपरेको छ । अझैपनि माडीका भूमिहिन तथा सुकुम्बासीले लालपुर्जा पाउन सकिरहेका छैनन् । माडी कृषि, पशुपालन र पर्यटनमा प्रशस्त सम्भावना भएतापनि आर्थिक स्रोतको अभावमा फस्टाउन सकेको छैन ।
हुलाकी सडक रुट अन्तर्गतका सबै खोलाहरुमा पुल निर्माणको चरण सम्पन्न भइसक्दा समेत बर्सेनि पतरे खोला अलपत्र पर्दै आएको छ ।
उता, बारम्बार निकुञ्ज सडक कालोपत्रेका लागि भन्दै माडीका जनप्रतिनिधिसहितको टोली डेलिगेसन जानेक्रम बढ्दै आएको भएपनि प्रतिफल शुन्य छ । शिर्षस्थ नेताहरु निकुञ्ज ऐनलाई देखाएर टाढिने र चुनावका बेला निकुञ्ज सडक कालोपत्रेलाई मुल एजेन्डा बनाउनेक्रम बढ्दो छ ।
अघिल्लो निर्वाचनमा यसै क्षेत्रबाट सांसद बनेका पूर्वप्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्डले माडीलाई मणि सहित निकुञ्जमा आकाशे पुल र सुरुङ मार्गको सपना देखाएका थिए ।
हालका बागमती प्रदेशसभा सदस्य एवं पूर्व नगर प्रमुख ठाकुर प्रसाद ढकाल समेत मेयर हुँदा निकुञ्जमा धुलोरहित सडकका लागि सेतो लिक्विट राख्ने भन्दै भारत भ्रमणमा गएका थिए ।
सोही सडकका लागि कालोपत्रे गर्न फेरि अहिले वातावरणिय अध्यन मुल्यांकन (इआईए) को तयारी भइरहेको छ ।