भरतपुर महानगरपालिका वातावरण तथा विपद व्यवस्थापन महाशाखाको आयोजनामा भरतपुरका मुख्य सहरी क्षेत्रमा सरसफाइ अभियान थालनी गरिएको छ ।

मेयर रेनु दाहालको प्रमुख आतिथ्यतामा चौबीसकोठी हुँदै लायन्स चोकसम्मको फोहोर व्यवस्थापनमा पहल थालिएको हो । हरेक शुक्रबार महानगरले सरसफाइको कार्यक्रमलाई पहिलो प्राथमिकतामा राखेर काम सुरुवात गरिएको भरतपुर महानगरपालिका वातावरण तथा विपद व्यवस्थापन महाशाखाका प्रमुख बिस्सु राम कुँवरले जानकारी दिनुभयो ।

ग्रीन भरतपुर क्लिन भरतपुर भन्ने नाराका साथ भरतपुरलाई स्वच्छ सफा र हरियाली वातावरण निर्माण गर्ने लक्ष्य अनुरुप सरसफाइको योजना अगाडि बढाइएको भरतपुर महानगरले जनाएको छ ।

उता, महानगरले यसअघिपनि अव्यवस्थित पार्किङलाई हटाएको थियो । जिल्ला प्रहरी कार्यालय भरतपुरको समन्वयमा भरतपुर अस्पताल अगाडिको अव्यवस्थित पार्किङ हटाएको हो । अव्यवस्थित पार्किङलाई व्यवस्थित गर्दै भरतपुरको सौन्दर्यलाई जीवन्त राख्न भरतपुर र नारायणगढका विभिन्न चोक तथा सहरहरुको निगरानी बढाइएको हो ।

यसैगरी जिल्ला ट्राफिक प्रहरी कार्यालयका प्रमुख प्रहरी निरीक्षक सुरेश सुवेदीले अधिकांश सवारी दुर्घटना सडककै कारण हुने भएकाले सडकमा हुने अव्यवस्थित जामलाई नियन्त्रण गर्न लागिएको बताउनुभयो । उहाँले अनियंत्रित तरिकाले सडकमा सवारीसाधन गुडाउने चालकलाई समेत कारबाही गरिने बताउनुभयो ।
यसैगरी भरतपुर महानगरपालिका वडा नं. १० का वडा सदस्य रेशमराज थापाले अत्यन्त भिडभाड हुने चोकहरुमा तत्काल सिसि क्यामेरा जडान गर्नुपर्ने बताउनुभएको छ । भरतपुर १० का केही चोकहरुमा वडाले सिसि क्यामेरा राख्नको लागि पहल थालेको समेत थापाले जानकारी दिनुभयो ।