नेपालमा करिब ६० प्रतिशत मानिस क्षयरोगबाट प्रताडित बनेको चितवन हस्पिटलका कन्सलटेन्स फिजिसियन डा. बिजय प्रसाद पौडेलले बताउनुभएको छ ।
पारदर्शी अनलाइन डटकमसंग संक्षिप्त कुराकानी गर्नुहुँदै पौडेलले क्षयरोग माइकोव्याक्टेरियम ट्युवरकुलोसिस नामक किटाणुबाट लाग्ने एक किसिमको सरूवा रोग भएको बताउनुभयो ।
वि.स.२०७० को तथ्यांक अनुसार नेपालमा करिब ८० हजारदेखि ९० हजार मानिस क्षयरोगबाट पीडित छन् । करिब ५ हजारदेखि ७ हजार व्यक्ति प्रति वर्ष क्षयरोगबाट मृत्यु हुने गरेको छ ।
क्षयरोग लागेका व्यक्तिमा रोगसंग लड्ने प्रतिरक्षा शक्ति कमजोर हुने हुँदा प्रताडित मानिस शिथिल बन्दै जाने पौडेलले बताउनुभयो ।
कुपोषण, एच.आई.भी.संक्रमण भएका मानिसहरुमा यो रोग छिटो विकसित हुने उहाँको भनाइ छ ।
मुख्यतः क्षयरोगलाई दुई भागमा वर्गीकरण गर्न सकिने पौडेलले बताउनुभयो । फोक्सोको क्षयरोग र फोक्सो बाहेक अन्य भागमा लाग्ने क्षयरोग (ग्रन्थी, आन्द्रा, मेनेन्जेस, हाड, प्रजनन तथा मूत्र प्रणाली, छाला, आँखा आदि)।
फोक्सोको क्षयरोगका लक्षणहरू – दुई साता वा सो भन्दा बढी समयसम्म लगातार खोकी लागिरहनु, शरीरको तौल घट्नु, खासगरी बेलुकापख ज्वरो आउनु,छाति दुख्नु ,खाना अरुची हुनु,खकारमा रगत देखिनु आदि यसका लक्षण रहेको पौडेलले बताउनुभयो ।