नेपाल भारत आदिवासी जनजाति मैत्रीसंघका अध्यक्ष बिनोदकुमार गुरुङले देशमा धार्मिक एकताको खाँचो भएको बताउनुभएको छ ।
गलेश्वर आश्रम, देवघाटमा शनिबार भएको धार्मिक कार्यक्रमलाई सम्बोधन गर्नुहुँदै गुरुङले सो कुरा बताउनुभएको हो । उहाँले नेपाल सबै जातजातिको साझा फुलबारी भएकाले सबैले आआफ्नो धार्मिक परम्पराको जगेर्ना गर्नुपर्ने बताउनुभयो ।
हिन्दु धर्मको जगेर्नामा नेपाल भारत मैत्रीसंघले ठूलो काम गर्दै आएको जिकिर गर्नुभयो । आस्था र विश्वासको प्रतीक गलेश्वर बाबाद्वारा स्थापित देवघाट क्षेत्रको स्तरोन्नति सहित सबैभन्दा पुरानो यस गलेश्वर आश्रमको बिकासमा समेत आफूले ठूलो पहल समेत गरेको बताउनुभयो ।
गुरुङले निकट समयमा नेपाल भारत दुई देशका प्रधानमन्त्रीबीच गलेश्वर आश्रममा बृहत कार्यक्रमको उद्घाटन गर्ने योजना गरेको बताउनुभयो ।
पवित्र तीर्थस्थल देवघाटधाममा अवस्थित गलेश्वर आश्रममा नेपाल भारत आदिवासी जनजाति मैत्री सङ्घको आयोजनामा अमृत भोजन तथा नेपाल भारत धार्मिक, सांस्कृतिक सम्बन्ध विषयक अन्तरक्रिया समेत गरिएको थियो ।
त्यस्तै कार्यक्रममा गलेश्वर आश्रमका पीठाधीश अनन्त श्रीविभूषित महामण्डलेश्वर स्वामी आत्मानन्द गिरिजी महाराजले हिन्दु धर्मको महत्त्व र गलेश्वर आश्रमको महिमा आदिका बारेमा जानकारी गराउनुभएको थियो ।
कार्यक्रममा देवघाट गाउँपालिकाका अध्यक्ष तिलबहादुर थापा नेपाल भारत धार्मिक, सांस्कृतिक मैत्री सम्बन्धका विभिन्न पदाधिकारी एवं धार्मिक व्यक्तित्वहरुको सहभागीता रहेको थियो ।