कवि एवं साहित्यकार होमनाथ घिमिरेले साहित्य समाजको ऐना भएको बताउनुभएको छ ।
समाज परिवर्तनमा यसको अत्यन्तै महत्त्व रहेकाले साहित्य साधनालाई अगाडि बढाउनुपर्ने बताउनुभयो ।
पारदर्शी सम्वादमा संक्षिप्त कुराकानी गर्नुहुँदै घिमिरेले सो कुरा बताउनुभएको हो । बिज्ञान र प्रविधिको युगसंगै आजको नयाँ पुस्ता लेखनशैलीबाट टाढा भएको स्मरण गर्नुभयो ।
वि.स. २०१८ साल असोज ५ गते शीतलपानी, जगतपुर, चितवनमा माता शिवकदेवी घिमिरे र पिता वासुदेव घिमिरेको कोखबाट उहाँको जन्म भएको हो ।
गोरेटो छन्द कवितासङ्ग्रह २०७५, जिन्दगीका तरङ्गहरू गजल सङ्ग्रह २०७९, राष्ट्रिय बहरमाला-२, संयुक्त लेखन २०७५, वृहत कविता सङ्ग्रह, संयुक्त लेखन/अमेरिका २०८०, राष्ट्रिय बहरमाला-३, संयुक्त लेखन २०८०, पथिक खण्डकाव्य २०८१, मुगलान महाकाव्य २०८१ जस्ता विभिन्न गजल तथा कविताहरु प्रकाशित भइसकेका छन् ।
घिमिरेका प्रकाशित अन्य कृतिहरुमा बाल कविता सङ्ग्रह, गद्य कविता सङ्ग्रह, यात्री महाकाव्य, कुश्माखर महाकाव्य रहेका छन् ।
उहाँ लायन्स क्लब अफ चितवन वाङ्मय, साहित्य सङ्गम चितवन, पल्लव साहित्य प्रतिष्ठान नारायणगढ चितवन, वाल्मीकि साहित्य सदन रत्ननगर, कालिगण्डकी साहित्य परिषद् चितवन, साहित्य सङ्गम नुवाकोट, त्रिवेणी साहित्य प्रतिष्ठान गैंडाकोट र नवसाहित्य मञ्जरी चितवनमा समेत आबद्ध हुनुहुन्छ ।
हाल भरतपुर महानगरपालिका वडा नं. १०, बौद्धिक कामना टोल भरतपुरमा बस्दै आउनुभएका घिमिरे हालसम्म भारत, बङ्गलादेश, जापान, अमेरिका र थाइल्याण्ड जस्ता देशहरुको भ्रमण गरिसक्नुभएको छ ।