देवघाट गाउँपालिकाको आर्थिक बर्ष ०८२/८३ को निति तथा कार्यक्रम सम्बन्धि सुझाव संकलन सम्पन्न भएको छ ।
देवघाट गाउँपालिकाका अध्यक्ष तिलबहादुर थापाको अध्यक्षतामा भएको कार्यक्रममा अधिकांश गाउँबासीहरुले फोहोरमैला व्यवस्थापन गर्नुपर्ने, तालिममा सबैको सहभागीता हुन नसकेको, एउटै व्यक्ति बारम्बार दोहोरीएको गुनासो, बजेट निर्माण गर्दा कुनै एउटा पूर्वाधार मात्र समेटिएको, शिक्षा, स्वास्थ्य खेलकुद र सडक निर्माणमा अझै राम्रो बिकास नभएको जस्ता गुनासो र सुझाव पेश गरेका थिए ।
त्यस्तै उनीहरूले दुग्ध किसानहरुले भुक्तानी नपाएको तथा कम मूल्यमा दुध बिक्री गर्न बाध्य हुनुपरेको समेत गुनासो गरेका थिए । कृषि तथा पशुपालनलाई अर्थोपार्जनमा जोड्नुपर्ने आम नागरिकको सुझाव थियो ।
कतिपयले देवघाटलाई धार्मिक क्षेत्र बनाइएतापनि यसै क्षेत्रका स्थानीयले नभई बाहिरी क्षेत्रका मानिसले फाइदा लिने गरेको बताए ।
देवघाटमा उद्योगहरुको लगत तथा डेटा संकलन गरि दर्ता नभएका उद्योग तथा पसल तत्काल दर्ता गराउन समेत आह्वान गरिएको थियो ।
विभिन्न प्रशासनिक काम तथा योजनाको मागका लागि आउने सेवाग्राहीहरुले जनसेवालाई थप प्रभावकारी बनाउदै लैजानुपर्ने र कार्यालयमा भएका कर्मचारी बाहिर निस्कदा रिसेप्सनमा रेकर्ड राख्नुपर्ने जस्ता सुझाव दिएका थिए ।