बर्लिनस्थित नेपाली दूतावासले पोल्यान्डका नेपालीलाई विद्युतीय राहदानी (ई-पासपोर्ट) वितरण कार्य सम्पन्न गरेको छ। राहदानी वितरण वार्सास्थित अवैतनिक वाणिज्यदूत कार्यालय मार्फत गरिएको हो ।

कार्यालयका अनुसार, जुलाई २० मा २४८ जना, अगस्ट ३ मा १८० जना तथा अगस्ट १७ मा ३३२ जनाले नयाँ राहदानी प्राप्त गरेका छन् । दूतावासबाट तयार भएर पठाइएका राहदानीहरू क्रमशः सेवाग्राहीलाई हस्तान्तरण गरिएको हो ।

“अहिलेसम्म वितरण नभएकाहरूले पनि अवैतनिक वाणिज्यदूत कार्यालयमा प्रि-अपोइन्टमेन्ट लिएर राहदानी लिन सक्नेछन्,” वार्सा क्षेत्रका नेपाली वाणिज्यदूत डा. बोधराज सुवेदीले जानकारी दिए ।

यसअघि गत अप्रिल २ देखि ४ सम्म बर्लिनस्थित दूतावासले पोल्यान्डमा आयोजना गरेको घुम्ती शिविरमा ८६३ जनाले राहदानीका लागि आवेदन दिएका थिए।