माडी ९ स्थित हनुमानझुलामा विद्युत सेवा पुग्न ढिलाई हुँदा स्थानीय बासीहरु टुकी बत्तीको भरमा जीवनयापन गर्न बाध्य छन् ।
सरकारले विद्युतिकरणको लागि प्रक्रिया अगाडि बढाएको भएतापनि निकुञ्जकै कारण त्यहाँ बिजुली जान नसकेको हो । ऊर्जा, जलस्रोत तथा सिँचाइमन्त्री शक्तिबहादुर बस्नेतले यसअघि सो स्थानमा बिजुली उपलब्ध गराउने प्रतिबद्धता जनाउनुभएको थियो ।
नेपाल विद्युत प्राधिकरणले बाँदरझुलामा विद्युतीकरणका लागि दुई वर्षअघि रु दुई करोड ५० लाख विनियोजन गरी बोलपत्र समेत आह्वान गरेको थियो ।
तर, चितवन राष्ट्रिय निकुञ्ज कार्यालयले सो बस्ती आफ्नो मध्यवर्ती क्षेत्रमा पर्ने भन्दै अव्यवस्थित बस्तीलाई अतिक्रमण वा बढावा दिनेगरी कुनै योजना सञ्चालन नगर्न पत्राचार गरेपछि विद्युतीकरणका लागि गरिएको टेन्डर प्रक्रिया रोकिएको वडाध्यक्ष घनश्याम दवाडीले जानकारी दिनुभयो ।
बाँदरझुला क्षेत्र पर्साको ठोरी र भारतीय सीमासँग जोडिएको क्षेत्र हो । निकुञ्जले आफ्नो क्षेत्र दाबी गरेको बाँदरझुलामा करिब ७ सयको हाराहारीमा घरधुरी रहेको दवाडीले बताउनुभयो ।
त्यहाँका विद्यालय तथा स्वास्थ संस्थाहरुले हाल सोलार पाताबाट विद्युतिय उपकरणहरु चलाउदै आएका छन् । बढ्दो भूमिहिन समस्या, खानेपानी, मोबाइल नेटवर्क र बिजुली बत्ती आदि त्यहाँका प्रमुख समस्याहरु हुन् ।
उता निकुञ्जकै कारण बेलाबखतमा सो बस्ती अन्यत्र स्थानान्तरण गर्नुपर्ने आवाज तिब्र रुपमा उठ्दै आएकालेपनि त्यस क्षेत्रको बिकासका लागि धुरमुरे प्रवृत्ति हाबी भएको देखिन्छ ।