चितवन — नारायणगढ–मुग्लिन सडकखण्डको दासढुङ्गादेखि मुग्लिनसम्मको भाग वर्षैभरि पहिरोको उच्च जोखिममा रहने गरेको छ। वर्षामा लेदो सहितको र पानी नपर्दा सुक्खा पहिरो खस्ने समस्या निरन्तर छ।

सडक डिभिजन कार्यालय भरतपुरका सूचना अधिकारी कृष्णप्रसाद आचार्यका अनुसार यो सडक चीन सरकारको सहयोगमा विसं २०३३ मा बनेको र पछिल्लो विस्तार विश्व बैंकको सहयोगमा गरिएको हो। यद्यपि भू–बनोट कमजोर (‘फ्याक्चर्ड रक’) भएकाले दासढुङ्गादेखि मुग्लिनसम्म पहिरोको जोखिम हट्न सकेको छैन।

यस वर्ष तुइनखोला, नाम्सीखोला र कालीखोला क्षेत्रमा क्रमशः १६०, १५० र ५० मिटर क्षेत्रमा उच्च जोखिम रहेको छ। डिभिजन कार्यालयले पहिरो न्यूनीकरणका लागि उपकरण तयारी अवस्थामा राखेको र विभागमा रोकथाम योजना पठाएको जनाएको छ।

राजधानी र गण्डकी प्रदेश जोड्ने लाइफलाइन मानिने यो सडकमा पहिरोका कारण बारम्बार अवरोध हुँदा यात्रुहरूलाई सास्ती खेप्नुपरेको छ।