देवकोटा जयन्ती, साहित्यिक वाचन र लक्ष्मीपूजामार्फत पोल्यान्डमा नेपाली भाषा–साहित्य र संस्कृतिको सन्देश

वार्सा, पोल्यान्ड । महाकवि लक्ष्मीप्रसाद देवकोटाको साहित्यिक योगदानको स्मरण गर्दै नेपाली भाषा, साहित्य, कला र संस्कृतिको संरक्षण तथा पुस्तान्तरण गर्ने उद्देश्यसहित पोल्यान्डको राजधानी वार्सामा देवकोटा जयन्ती, साहित्यिक वाचन, देउसी–भैलो तथा लक्ष्मीपूजा कार्यक्रम भव्य रूपमा सम्पन्न भएको छ।

अन्तर्राष्ट्रिय नेपाली साहित्य समाज (अनेसास) पोल्यान्ड च्याप्टरको आयोजनामा नोभेम्बर ७, २०२६ शनिबार वार्सास्थित polna १३, हिमालयन यति रेस्टुरेन्टमा आयोजित कार्यक्रममा नेपाली साहित्य र मौलिक संस्कृतिको आकर्षक संगम देखिएको थियो।

कार्यक्रममा एनआरएनए पोल्यान्डकी अध्यक्ष रीता तिवारी न्यौपाने प्रमुख अतिथिका रूपमा उपस्थित हुनुहुन्थ्यो भने कार्यक्रमको सभापतित्व शिवकुमार अधिकारीले गर्नुभएको थियो।

कार्यक्रममा पोलिस नेपाल फाउन्डेसनका पूर्व अवैतनिक वाणिज्यदूत तथा राजदूत डा बोधराज सुवेदी, एफआरएनएका संस्थापक तथा साथी सञ्जालका परिकल्पनाकार एवं सामाजिक अभियन्ता मित्रलाल पार्दे, काठमाडौं विश्वविद्यालयका प्राध्यापक खगेन्द्र आचार्य, शशि गजुरेल तथा एनआरएनए आईसीसी सदस्य ईश्वर देवकोटा विशेष अतिथिका रूपमा सहभागी हुनुहुन्थ्यो।

त्यसैगरी शेर्पा किदुङ पोल्यान्डका अध्यक्ष जङ्गबु शेर्पा, श्रम संस्कृति पार्टी प्रवासका अध्यक्ष प्रकाश लामा, इनास पोल्यान्डका अध्यक्ष तुलसा पोखरेल, व्यवसायी रामप्रसाद न्यौपाने, पूर्व एनआरएनए अध्यक्ष तथा होटल व्यवसायी जीवन केसी, नेपाली जनसम्पर्क समिति पोल्यान्डका अध्यक्ष भीम परियार , कर्णाली सेवा समाजका संयोजक भीमबहादुर रावत, POL HOB JOB का प्रतिनिधि अरविन कलवारलगायत विभिन्न संघसंस्थाका प्रतिनिधिहरूको उपस्थिति थियो।

देवकोटाको कविताबाट सुरु, साहित्यसँगै संस्कृतिको उत्सव

महाकवि देवकोटाको कविता वाचनबाट कार्यक्रमको औपचारिक सुरुवात गरिएको थियो। देवकोटाका रचनामार्फत नेपाली साहित्यको समृद्ध परम्परा र राष्ट्रिय चेतनालाई स्मरण गर्दै उहाँको साहित्यिक योगदानप्रति श्रद्धा व्यक्त गरिएको थियो।

कार्यक्रममा सहभागी साहित्यप्रेमी तथा नेपाली समुदायका सदस्यहरूले देवकोटाका कविता तथा साहित्यिक रचनाहरू वाचन गरेका थिए। प्रवासमा रहेर पनि नेपाली साहित्यप्रतिको अनुराग र नेपाली भाषाप्रतिको अपनत्वलाई जीवन्त राख्ने प्रयासका रूपमा कार्यक्रमलाई हेरिएको थियो।

साहित्यिक कार्यक्रमसँगै नेपालीहरूको मौलिक पर्व तथा संस्कृतिको प्रतिनिधित्व गर्ने देउसी–भैलो प्रस्तुतिले कार्यक्रममा थप रौनक ल्याएको थियो।

देउसी–भैलो कार्यक्रममा काजल गिरीको नृत्य तथा सन्देश मोक्तान, सुजता सुवेदी, रमेश थापा मगर र शिवकुमार अधिकारीको वाचन तथा प्रस्तुतिले सहभागीलाई मनोरञ्जनसँगै नेपाली संस्कृतिको अनुभूति गराएको थियो।

विदेशी भूमिमा नेपाली संस्कृतिको उज्यालो

कार्यक्रमको अर्को महत्वपूर्ण पक्ष लक्ष्मीपूजा थियो। कार्यक्रममा सहभागी सम्पूर्णले सामूहिक रूपमा लक्ष्मीपूजा तथा आराधना गरेका थिए।

विदेशी भूमिमा नेपाली परम्परा, संस्कार र चाडपर्वलाई निरन्तरता दिँदै नयाँ पुस्तासम्म नेपाली संस्कृति हस्तान्तरण गर्ने उद्देश्यले लक्ष्मीपूजालाई पनि कार्यक्रमसँग जोडिएको आयोजक पक्षले जनाएको छ।

यसले पोल्यान्डमा रहेका नेपालीहरूबीच धार्मिक तथा सांस्कृतिक एकताको भावनालाई अझ बलियो बनाएको सहभागीहरूको धारणा थियो।

“देवकोटालाई सम्झनु भनेको नेपाली भाषालाई सम्झनु हो”

कार्यक्रमले महाकवि देवकोटालाई सम्झने अवसर मात्र प्रदान गरेन, प्रवासमा नेपाली भाषा, साहित्य र संस्कृतिको संरक्षणका लागि सामूहिक प्रतिबद्धताको आवश्यकता पनि औँल्याएको छ।

विदेशमा हुर्किरहेका नेपाली बालबालिका तथा नयाँ पुस्तालाई आफ्नो भाषा, साहित्य, संस्कृति र मौलिक पहिचानसँग जोड्न यस्ता कार्यक्रम महत्वपूर्ण हुने सहभागीहरूको भनाइ थियो।

नेपालीहरू विश्वका जुनसुकै देशमा पुगे पनि भाषा, साहित्य, संस्कृति र संस्कार नै नेपाली पहिचानका बलिया आधार हुन् भन्ने सन्देश कार्यक्रमले दिएको छ।

विभिन्न संघसंस्थाको सहकार्य

कार्यक्रमको मुख्य प्रायोजन POL HOB JOBले गरेको थियो। साथै पोल्यान्डमा सक्रिय विभिन्न नेपाली संघसंस्था तथा समुदायका व्यक्तिहरूले कार्यक्रम सफल बनाउन सहयोग गरेका थिए।

विभिन्न क्षेत्रका सामाजिक अभियन्ता, साहित्यकार, व्यवसायी, संघसंस्थाका प्रतिनिधि तथा नेपाली समुदायको उल्लेख्य सहभागिताले कार्यक्रमलाई सामूहिक नेपाली सांस्कृतिक उत्सवको रूप दिएको थियो।

कार्यक्रमको सञ्चालन सुजता सुवेदीले गर्नुभएको थियो।

प्रवासमा नेपालीपन जोगाउने अभियान