चितवन महोत्सव आउँदो पौष २५ देखि माघ १० गतेसम्म संचालन हुने भएको छ ।

प्रत्येक २/२ बर्षको अन्तरालमा वि.स. २०५३ सालदेखि चितवनमा महोत्सव गर्न लागिएको हो । सो महोत्सव अहिले १५ औं संस्करणको रूपमा पुगेको हो । जिल्लाको सामाजिक आर्थिक तथा सांस्कृतिक बिकासमा सहकार्य गर्दै सार्वजनिक निजी साझेदारीको रूपमा महोत्सवले महत्त्वपूर्ण भूमिका खेल्दै आइरहेको छ ।

उद्योग वाणिज्य संघ चितवनको आयोजना एवं भरतपुर महानगरपालिका र जिल्ला समन्वय समिति चितवनको मुख्य प्रवर्द्धनमा महोत्सव आयोजना गरिएको हो ।

पन्ध्रदिनसम्म संचालन हुने महोत्सवमा बिगतका महोत्सवहरुमा झैं विविध खेलकुद, जलयात्रा, स्वास्थ्य सेवा, आदिवासी जनजातिहरुको भेषभुषा, कला संस्कृति झल्कने विविध मनोरञ्जनात्मक सांस्कृतिक कार्यक्रम राष्ट्रिय कलाकारहरुको प्रस्तुति र प्रतियोगितात्मक कृषि उपजको प्रदर्शनी रहने उद्योग वाणिज्य संघ चितवनका अध्यक्ष एवं चितवन महोत्सव मुल संयोजक सुमन कुमार श्रेष्ठले जानकारी दिनुभयो ।

नारायणी नदी किनारमा हुने महोत्सवमा ४३० वटा स्टलहरु रहनेछन् । र ती सबै स्टलको विमा समेत गरिएको आयोजकले जनाएको छ । यस बर्षको महोत्सवमा अन्तर्राष्ट्रिय व्यवसायीक प्रतिष्ठानको उल्लेख्य सहभागीता रहनेछ ।

महोत्सवमा प्रवेश शुल्क सर्वसाधारणका लागि रु. १०० विद्यार्थीका लागि रु. ५० राखिएको छ । आन्तरिक तथा वाह्य पर्यटक सहित करिब ५ लाख दर्शकले अबलोकन गर्ने महोत्सवमा करिब ३० करोड भन्दा माथीको कारोबार हुने अपेक्षा आयोजकले लिएको छ ।