चितवनको पवित्रभुमि देवघाटमा पौष २८ गतेदेखि माघ ५ गतेसम्म श्रीमद् तारतम वाणी चर्चा एवं श्रीमद्भागवत हुने भएको छ ।
श्रीकृष्ण कृपाधाम मन्दिर देवघाट ५ तनहुँको आयोजनामा हुने सो बृहत् महायज्ञमा श्रीकृष्ण मङ्गलम गुरुजीको मुखारविन्दबाट र नेपालकै पहिलो भागवत बाचिका एवं श्रीमद्भागवत कथा सादवी १०८ तारा माताजीको मुखारविन्दबाट हुन लागेको हो ।
श्रीमद् तारतमवाणी र श्रीमद्भागवतको पाठ पाँचजना विद्वान गुरुजनहरूबाट हुने मन्दिर समितिले जनाएको छ । सातदिन सम्म हुने महायज्ञमा कलश यात्रा सहित कथा बाचन, कृष्ण महिमा, पंचम भागवत् पाठ, दुई तारतम पाठ अनि ब्रतबन्ध समेत गरिने माता तारा घिमिरेले जानकारी दिनुभयो ।
सो कथा पाठपारायणमा झन्डै १० हजार भन्दा बढी भक्तजनहरुको सहभागीता रहने अपेक्षा आयोजकले लिएको छ । यसअघि पनि हुँदै आइरहेका धार्मिक कार्यक्रमहरुमा चितवन सहित बारा, पर्सा, मकवानपुर, ललितपुर, हेटौंडा लगायत अन्य जिल्ला तथा छिमेकी राष्ट्र भारतबाट समेत मानिसहरू आउने गरेका छन् ।
देवघाट ५ तनहुँमा अबस्थित श्रीकृष्ण कृपाधाम मन्दिरमा स्थापनाकालदेखि श्रीकृष्णजन्माष्टमी, शिवारात्री आदि पर्वहरुमा समेत महायज्ञ हुँदै आइरहेको छ ।