नेपाली कांग्रेस पूर्व आप्रवासी विभागले भरतपुरमा आयोजना गरेको बिदेशदेखि स्वदेशसम्म बागमती प्रदेशस्तरीय भेला आज सम्पन्न भएको छ ।

विभागका संयोजक एवं पार्टीका केन्द्रिय सदस्य दिनेश कोइरालाको अध्यक्षतामा भएको कार्यक्रममा पूर्व उपप्रधानमन्त्री एवं नेपाली कांग्रेसका केन्द्रीय उपसभापति पूर्णबहादुर खड्काको प्रमुख आतिथ्यता रहेको थियो ।

बागमती प्रदेश स्तरीय भेलाको उद्घाटन गर्नुहुँदै खड्काले संविधान संसोधन गर्न जरुरी भएको बताउनुभयो । कांग्रेस विपिको सपना पूरा गर्न सधैं तत्पर बनेको जिकिर गर्दै उहाँले अहिलेको वर्तमान सरकारका विषयमा टिकाटिप्पणी नगर्न आग्रह गर्नुभयो ।

देशका कयौं परिवर्तनकारी भूमिकामा कांग्रेसले खेलेको योगदानको प्रशंसा गर्नुपर्ने बताउदै खड्काले संविधान र लोकतन्त्रको मलजल गर्नुपर्ने धारणा राख्नुभयो । देशलाई बिकास समृद्धि र सुशासन प्रदान गर्न सरकार लागिपरेको बताउनुभयो । सहकारी प्रकरणदेखि विभिन्न काण्डमा मुछिएकालाई कारबाही गर्न कांग्रेस एमाले सफल भएको दाबी गर्नुभयो ।

स्वदेश तथा विदेशमा रहेका आप्रवासीहरुको साझा संगठन युवाहरुको हितको लागि काम गर्दै आएको बताउदै उहाँले रोजगारी प्रवर्द्धनका लागि कांग्रेसले समेत जोड दिएको बताउनुभयो ।कार्यक्रममा नेपाली कांग्रेसका केन्द्रीय सदस्य एवं पूर्वमन्त्री उमा रेग्मी, जिल्ला सभापति राजेश्वर खनाल, भरतपुर महानगर सभापति चित्रसेन अधिकारी लगायतले मन्तव्य राख्नुभएको थियो ।

विदेशबाट फर्किएका कांग्रेसीहरुको विशेष उपस्थिती रहेको कार्यक्रममा आप्रवासी विभागका सदस्य एवं बागमती प्रदेशका संयोजक उमा कार्कीले स्वागत मन्तव्य राख्नुभएको थियो । कार्यक्रमको सहजिकरण विभागीय सचिव सुवास लोहनीले गर्नुभएको हो ।

उद्योग बाणिज्य संघ चितवनको सभाहलमा आज सम्पन्न भेलाले नेपाली कांग्रेस पूर्व आप्रवासी समन्वय बिभागद्वारा ७ वटै प्रदेशमा प्रदेश स्तरीय भेला गर्ने निर्णय गरेको छ । यो संगै दुईवटा प्रदेश लुम्बिनी र बागमती प्रदेशमा भेला सम्पन्न गरेको हो । यसअघि माघ १२ र १३ गते लुम्बिनी प्रदेशको बुटवलमा भेला सम्पन्न भएको विभाग संयोजक दिनेश कोइरालाले जानकारी दिनुभयो ।

कार्यक्रममा बागमती प्रदेशका बिभिन्न जिल्लाहरुबाट ५० जना प्रतिनिधिहरुको सहभागिता रहेको थियो । यसैगरी पार्टीले कार्यक्रममा खादा माला तथा धेरै आसनग्रहणको समयलाई समेत हटाउदै आएको छ ।

बन्द सत्रमा तथ्याङ्क संकलन, संरचना निर्माण तथा आप्रवासीहरुको समस्या र सुझाव लगायतका विषय केन्द्रीत गराइएको कोइरालाले जानकारी दिनुभयो ।

उक्त विषयलाई ७ वटै प्रदेशमा प्रस्ताव राखिने र  स्वीकृत भइ आएका निस्कर्षलाइ दस्तावेज तयार गरि केन्द्रमा पठाइने विभागका संयोजक एवं केन्द्रिय सदस्य दिनेश कोइरालाले जानकारी दिनुभयो ।