राष्ट्रिय स्वतन्त्र पार्टी (रास्वपा)को प्रथम राष्ट्रिय महाधिवेशनको बन्दसत्र आज बिहान ८ः३० बजेदेखि चितवन उद्योग सङ्घको प्रदर्शनी केन्द्रमा सुरु हुँदैछ।

बन्दसत्रमा अनुशासन आयोग, आर्थिक तथा संगठनात्मक प्रतिवेदनमाथि छलफल गरिनेछ भने विधान र राजनीतिक प्रतिवेदन अनुमोदन गर्ने कार्यसूची रहेको छ। त्यसपछि सभापति रवि लामिछानेले अन्तरिम व्यवस्थापन समिति गठनको घोषणा गरी निर्वाचन प्रक्रिया अघि बढाउने कार्यक्रम रहेको छ।

महाधिवेशनअन्तर्गत दिउँसो १ बजेदेखि उम्मेदवार मनोनयन फारम वितरण, २ बजेदेखि ४ बजेसम्म मनोनयन दर्ता र साँझ उम्मेदवारको नामावली प्रकाशन गरिनेछ।

रास्वपाका अनुसार असार ९ गते सभापति र ९९ जना केन्द्रीय सदस्यका लागि मतदान हुनेछ। बन्दसत्रमा ४ हजार २११ जना प्रतिनिधि, पर्यवेक्षक तथा स्वयंसेवक सहभागी हुनेछन्।