साहित्यकार तथा कवि गणेश शर्मा पौडेलको कुथुङ्ग्रो (लघुकथा) प्रकाशनमा आएको छ ।

सानै उमेरदेखि जिज्ञासु र लगनशील शर्मा वाल्यवस्थादेखि साहित्य सिर्जनामा लाग्नुभएको हो । उहाँले थुप्रै लेख तथा साहित्य सिर्जना र कविताहरुमा कलम चलाउनुभएको छ ।

शर्मा कालीगण्डकी साहित्य परिषद् चितवनको सभापति र साहित्य साधनाका अथक योद्धा समेत हुनुहुन्छ । वि.स. २००२ सालमा बागलुङ जिल्लाको पैयुँ थनथापमा जन्मनुभएका शर्माले शिक्षा सेवा, राजनीति र समाजसेवामा समर्पित हुँदै लामो समयदेखि पूर्णरूपमा साहित्य सेवामा समर्पित व्यक्तित्व हुनुहुन्छ ।

मुक्तक, गजल, ताङ्का, कविता र कथा लेखनमा रुची भएका पौडेलको प्रस्तुत लघुकथा सङ्ग्रह पहिलो प्रकाशित कथा सङ्ग्रह हो । कथाकार शर्माले देश, काल परिस्थिति र हाम्रो आफ्नै भोगाइमा आधारित विभिन्न विषयलाई समेटेर विभिन्न कृति तयार पार्नुभएको छ ।

७९ बर्षको उमेरमा समेत अझैपनि साहित्य क्षेत्रप्रति उहाँको रुची प्रशंसनीय छ । उहाँले स्व. राजा वीरेन्द्र विर विक्रम शाहदेवबाट शुभराज्यभिषेक पदक र कदर पत्र २०२९, राज्यबाट राजनीतिक पीडित ३ बिगाहा जमिन बर्दघाट माकर २०२९, हाम्रो मझेरी साहित्य प्रतिभा सम्मान २०६० जस्ता थुप्रै संघसंस्थाबाट सम्मान पाउनुभएको छ ।

शर्माले फर्केर हेर, लेख, कालीगण्डकी साहित्य पियूष, सगोल, मेरो आँखामा देश, गीत गजल, पंक्षी मयूर, मनका तरङ्ग, लोकलय कविता, मधुरस, बिचारमा खडेरी, म जन्मिएको धरती गजल, र कुथुङ्ग्रो लघुकथा जस्ता कृतिहरु हालसम्म प्रकाशनमा ल्याउनुभएको छ ।

उहाँको कृति कुथुङ्ग्रो लघुकथामा सामन्ती रुख, राजनीति जुवा, हाँसोसंगै आँसु, संस्कार, मानवता, गरीबका कथा व्यथा, तीन पाने, तर्क, तिल्केको धोको, पौरख, भानुको सम्झनामा जस्ता थुप्रै विषयहरु उक्त कृतिमा समाबेश गरिएको छ ।