भरतपुर महानगरपालिका वार्ड नं. ९ को आयोजना र सत्व माइन्ड क्लिनिक काठमाडौँको सह आयोजनमा शुक्रबार मानसिक स्वास्थ्य अभिमुखी जनचेतनामूलक कार्यक्रम सम्पन्न भएको छ
कार्यक्रममा वडा अध्यक्ष यमलाल कंडेलले यस किसिमका जनचेतनामूलक कार्यक्रम आगामी वर्ष टोलटोलमा सञ्चालन गर्ने योजना रहेको बताए।
टोलको मागअनुसार वार्षिक कार्ययोजना बनाएर लक्षित वर्गमा कार्यक्रम गर्ने वडाध्यक्ष कंडेलले जानकारी दिए । वडाको वार्षिक कार्यक्रम अन्तर्गत उक्त कार्यक्रम गरिएको उनले बताए ।
कार्यक्रममा सहभागीहरूलाई मानसिक अस्पताल लगनखेलका चिकित्सा मनोविद निकिता प्रधानले समाजमा रहेका मानसिक रोगीहरूको चेतना गुम्ने कारण र मानसिक रोगबाट बच्ने उपायका बारेमा प्रशिक्षण दिएकी थिइन् ।
मानसिक रोग पत्ता लगाएर जनचेतना जगाउने हेतुले गरिएको कार्यक्रममा मनोविद प्रधानले सहभागीहरूलाई केही क्षण अभ्यासमेत गराएकी थिइन् ।
सत्य माइन्ड क्लिनिक प्रालीका निर्देशक मनसुन पौडेलले मानसिक स्वास्थ्य सम्बन्धी नकारात्मक धारणालाई हटाई मानसिक रोगसम्बन्धी सत्यतथ्य जानकारी दिने उद्देश्यले जनचेतनामूलक कार्यक्रम गरिएको बताए ।
कार्यक्रममा भरतपुर ९ नम्बर वडा अन्तर्गतका टोल सुधार समिति र आमा समूहका पदाधिकारी सहित उल्लेख्य सहभागिता रहेको थियो ।