बागमती प्रदेश सरकारका आर्थिक मामिला तथा योजना मन्त्री कुन्दनराज काफ्लेले देशको आर्थिक उन्नयनमा जोडदिन उद्यमशिलतामा जोड दिनुपर्ने बताउनुभएको छ ।
११५ औं अन्तर्राष्ट्रिय नारी दिवसका अवसरमा बागमती प्रदेश उद्योग परिसंघ महिला उद्यमी मंचले चितवन उद्योग संघमा आयोजना गरेको बृहत अन्तरक्रिया कार्यक्रमलाई सम्बोधन गर्दै मन्त्री काफ्लेले सो कुरा बताउनुभएको हो ।
आजको युगमा महिलापनि पुरुष जस्तै सक्षम भएकाले बिकास र समृद्धिका लागि महिलालाई स्थान दिनुपर्ने बताउनुभयो । अर्थतन्त्र बिना बिश्व अगाडि बढ्न नसक्ने जिकिर गर्दै मन्त्री काफ्लेले स्वदेशी बस्तुको निर्माणमा जोड दिनुपर्ने धारणा राख्नुभयो ।
बढ्दो दक्षजनशक्ति स्वदेशबाट बाहिरिएको स्मरण गर्दै उहाँले युवामैत्री रोजगारीको अबधारणालाई जोडदिन सरकार लागिपरेको बताउनुभयो ।
कृषि, पशुपालन व्यापार व्यवसाय आदि सबै क्षेत्रमा प्रचुर सम्भावना भएको बताउदै मन्त्री काफ्लेले युवाको सीप क्षमता अनुसारका निशुल्क तालिम तथा रोजगारीको बिस्तार गर्नुपर्ने तर्क गर्नुभयो ।
आजको २१ औं शताब्दीमा बिश्व जगत प्रबिधीमैत्री भएको उदाहरण प्रस्तुत गर्दै उहाँले श्रम सीप र जनशक्तिको खोजी राज्यले गर्नुपर्ने बताउनुभयो ।