अन्तराष्ट्रिय नारी दिवस (मार्च ८) काे अवसर पारि बेटर चितवनले विगतका वर्षहरुमा झैं यसवर्ष पनि विविध कार्यक्रम गरी उत्सवका साथ मनाउने भएको छ ।
बेटर चितवन र सामरी उत्थान सेवाको संयुक्त आयोजनामा सञ्चालन हुन लागेको १० औँ संस्करणको नारी उत्सव कार्यक्रमको तयारी करिब अन्तिम चरणमा पुगेको आयोजकले जनाएको छ। विगतका वर्षहरुमा जस्तै यसवर्ष पनि नारी दिवसको अवसरमा हुन लागेको ‘वाऊ ओमेन फेष्ट २०२५‘ को तयारी तिव्र छ ।
नारी उत्सवमा नाटक मञ्चन, प्यानल छलफल, वाऊ ओमेन अवार्ड सम्मान, नारी उद्यम प्रदर्शनी लगायत विभिन्न कार्यक्रमहरू हुन लागेको उत्सव संयोजक सनीसा आचार्यले बताउनुभयाे । बेटर चितवनले हरेक वर्ष मनाउँदै आएको यस नारी उत्सव सबै उमेर समूहका महिलाहरुको आवाजलाई मुखरित गर्ने र नारी हुनुमा सामूहिक गौरव महसुस गर्ने खुल्ला मञ्च भएको उहाँले जानकारी दिनुभयाे ।
आचार्यका अनुसार एक उदाहरणीय सशक्त महिलालाई यस वर्षको वाओ ओमेन अवार्ड प्रदान गरिँदैछ । गत वर्षको वाओ ओमेन अवार्ड माडी नगरपालिकाकाे नगर प्रमुख ताराकाजी महताेलाई प्रदान गरिएको थियो ।
बेटर चितवनको बार्षिक कार्यक्रम अन्तरगत प्रत्येक वर्षको मार्च ८ को अन्तराष्ट्रिय नारी दिवसमा चितवनमा नारी उत्सव हुँदै आएको छ। उत्सवमा आयोजित प्यानल छलफलमा प्रमुख वक्ताका रूपमा रिता शाह, डा सुवास बस्नेत र विमला देवी गायक सहभागी हुनेछन्, छलफलको सहजीकरण भने चितवनको महिला पत्रकार सिन्धु ढकालले गर्नु हुनेछ ।
प्यानल छलफलको विषय ‘सशक्त महिला, समुन्नत समाज नयाँ सोच, नयाँ सम्भावना’ मा नेपाली महिलाहरुको विभिन्न पक्ष केन्द्रित बहस हुनेछ । आउँदो शनिबार सञ्चालन हुने कार्यक्रम बिहान ११ बजे देखि साँझ ५ बजेसम्म भरतपुरको बोस्टन कलेजको सभाहलमा हुनेछ । कार्यक्रममा विशेषगरी चितवन र नवलपुर आसपासका युवा, बालबालिका, उद्यमी महिला , विभिन्न संघसंस्थाका प्रतिनिधिहरूको उत्साहजनक सहभागिता रहने अपेक्षा गरिएको छ।