एसोसिएसन अफ कन्सल्टिङ इन्जिनियर्स भरतपुरको पाँचौँ वार्षिक साधारण सभाबाट अध्यक्षमा ई. बिष्णु अधिकारी सर्वसम्मतले चयन हुनुभएको छ ।
आगामी तीनवर्षे कार्यकालका लागि ई. बिष्णु अधिकारीको अध्यक्षतामा एघार सदस्यीय नयाँ कार्यसमिति चयन गरेको हो ।
नवनिर्वाचित उपाध्यक्षहरुमा ई. खेम थापा बहादुर मगर, ई. दामोदर ढकाल, सचिवमा ई. आशा शर्मा, सहसचिवमा ई. केदार अधिकारी र ई. शिवराम पौडेल, कोषाध्यक्षमा ई.जनार्दन देवकोटा रहेका छन् ।
यस्तै, सदस्यहरुमा ई. गौरव पराजुली, ई. हेमन्त श्रेष्ठ, ई.अमृत गिरी र रोशन भाट निर्वाचित भएका छन् ।
सो अवसरमा बोल्दै प्रमुख अतिथि भरतपुर महानगरपालिकाका मेयर रेनु दाहालले देश विकासमा अहम् भूमिका निर्वाह गर्ने इन्जिनियरहरुको भूमिकालाई राज्यले सही सदुपयोग गर्नुपर्ने बताउनुभयो । उहाँले इन्जिनियरहरुको भूमिका महत्त्वपूर्ण रहेको बताउनुभयो। भरतपुरको विकास र समृद्धिमा इन्जिनियरहरुको भूमिका अतुलनीय रहेको भन्दै उहाँले प्रशंसा समेत गर्नुभयो ।
यसैगरी कार्यक्रममा बोल्नुहुँदै नवनिर्वाचित अध्यक्ष ई. विष्णु अधिकारीले राष्ट्रनिर्माणमा योगदान दिनसक्ने इन्जिनियरहरुको भूमिकालाई थप मजबुत बनाउँदै आफ्नो कार्यकाललाई सफल बनाउने प्रतिबद्धता व्यक्त गर्नुभयो ।