विश्व हिन्दु महासंघ जिल्ला कार्य समिति चितवनले आज एक कार्यक्रमकाबीच जिल्ला प्रशासन कार्यालयमा ज्ञापन पत्र बुझाएको छ ।
हिन्दु धर्म र धार्मिक संस्कारका नाममा देवघाटमा जथाभावी हुँदै आइरहेका गतिविधि र आर्थिक चलखेल गर्ने गरी बदनियतपूर्ण तरिकाले महायज्ञ भएको भन्दै समितिले यस्तो कार्यलाई तत्काल रोक्न प्रशासनमा माग गरेको हो ।
समितिका अध्यक्ष प्रेम प्रसाद गैरेको अध्यक्षतामा बसेको भेलाले गरेको निर्णय अनुसार जिल्ला प्रशासन कार्यालयमा बुझाइएको पत्रमा यस्तो भनिएको छ, उपरोक्त सम्बन्धमा, वैदिक सनातन हिन्दु धर्म र परम्परामा देवघाटधाम क्षेत्र हाम्रो मौलिक सभ्यताको आधार क्षेत्रको रुपमा स्थापित छ ।
सनातन परम्परा सस्कृति र धर्मको आस्थाको केन्द्रको रुपमा रहेको देवघाट क्षेत्रको आफ्नै मौलिक र विशिष्ट बालको परिचय छ । प्राचिन मानव सभ्यता विकास देखिनै वैदिक सनातनीहरुको धार्मिक धरोहरका साथै सिङ्गो कालिगण्डकी सभ्यताको साक्षी पनि हो । परापूर्व काल देखिनै यस क्षेत्रमा विभिन्न पर्व विशेष स्नान र मेला लाग्दै आएको इतिहास छ भने धार्मिक तथा आध्यात्मिक गतिविधिको केन्द्र विन्दु समेत यहि क्षेत्र हो।
सबै पर्वहरुको विशेष महत्व र मौलिकता बोकेको यस क्षेत्र विश्व भरका वैदिक सनातन हिन्दु धर्मालम्विहरुको पुण्य भुमि हो । विगत केहि दिन यता कुनै एक स्व घोषित महाराजको कुचेष्टाका कारण यो क्षेत्रका धार्मिक तथा आर्थीक गतिविधि कब्जामा परेको गुनासो जनस्तर बाट आएको छ ।
निरन्तर संचालनमा रहेका आश्रम, गुरुकुल, मठमन्दिर, शक्तिपिठ हरुलाई मकर सक्रान्तिको मकर स्नानमा कुनै पनि धार्मिक तथा आर्थिक गतिविधि नगर्न, नगराउन एक स्व घोषित कथाबाचक महाराज र उनका केहि अनुयायीहरुले अफवाह फैलाएको गुनासो यत्रतत्र छ ।
मकर स्नान महोत्सवको नाम दिई धार्मिक क्षेत्रमा अनुचीत आर्थिक गतिविधि बढेको समेत स्थानीयको गुनासो छ । स्थानिय प्रशासन सँग स्वीकृति लिई गर्न लागिएको भनिएको मकर स्नान महोत्सव निकै विवादमा परेको छ । यसरी कुनै एक व्यक्तिले धार्मिक क्षेत्रलाई कब्जा गर्ने रणनिति बनाई हिन्दु धर्मालम्बीहरुको मर्म र भावनामा ठेस पुराई अनुचीत आर्थिक चलखेल गरिनु धार्मिक समाजका लागि स्वीकार्य छैन ।
देवघाट क्षेत्र विकास समिति सँग ठेक्का लिई महिनौ दिन सम्म लाखौ भक्तजनहरुलाई प्रभावमा पारि स्वतन्त्र धार्मिक गतिविधिलाई नै रोक्ने गरि गर्न लागिएको उक्त महोत्सव आर्थिक चलखेल र अनुचित लाभको लागि भएको हाम्रो ठम्याई छ ।
त्यसैले स्थानिय नागरिक, स्थानिय धार्मिक समाज, आयोजक त्यस क्षेत्रका पिठाधिस मठाधिस स्थानिय मन्दिर समितिहरु, सरोकारवाला पक्ष, देवघाट क्षेत्र विकास समिति र स्थानिय प्रशासन समेतको सर्वपक्षिय बैठक बसी उक्त महोत्सवको औचित्य, उद्देश्य बारे छलफल गरि आर्थिक, सामाजिक र धार्मिक पक्षको पारदर्शिताको सुनिश्चितता गरेर मात्र सो महोत्सव संचालन गर्ने अनुमति दिनु पर्ने माग सहित यथासिघ्र सम्बन्धित पक्ष सँग छलफल गराउन माग राख्दछौ साथै स्थानिय धार्मिक संघ संस्था र सरोकारवाला पक्षलाई वेवास्था गरि काम कारवाही अगाडि बढे धार्मिक समाज त्यस्ता गतिविधि रोक्न बाध्य हुने जानकारी गराउदै अर्को सहमति नभए सम्म ति र त्यस्ता गतिविधिहरु तत्काल रोक्न अनुरोध गर्दछौ ।