श्री लक्ष्मी माध्यमिक विद्यालय भरतपुर ४ लंकुको ६१ औं वार्षिकोत्सव तथा अभिभावक दिवस सम्पन्न भएको छ ।
बिद्यालय व्यवस्थापन समितिका अध्यक्ष रामजी पौडेलको अध्यक्षतामा भएको कार्यक्रममा बागमती प्रदेशका पूर्व स्वास्थ्य मन्त्री उत्तम जोशीको प्रमुख आतिथ्यता रहेको थियो ।
कार्यक्रममा बोल्नुहुँदै जोशीले किताबी ज्ञानलाई मात्र नभई व्यवहारिक सीपलाईपनि संगसंगै लैजानुपर्ने तर्क गर्नुभयो । उहाँले आजको २१ औं शताब्दीमा आइपुग्दा समेत अझैपनि पुरातन सोच समाजमा रहिआएको बताउनुभयो ।
शिक्षा क्षेत्रमा देखिएका समस्या समाधानमा राज्यले तत्काल ध्यान दिनुपर्ने धारणा राख्नुभयो । नजिकिदै गरेको एसईइ परिक्षामा सामेल विद्यार्थीहरुलाई विद्यालयले नै निशुल्क कोचिङ ट्युसनको व्यवस्था गर्नुपर्ने बताउनुभयो ।
यसैगरी विद्यालय व्यवस्थापन समितिका अध्यक्ष रामजी पौडेलले विद्यालयको भौतिक तथा पूर्वाधार निर्माण सुविधाजनक रहेको बताउनुभएको छ । अङ्ग्रेजी नेपाली दुबै माध्यममा पढाई हुने हुँदा भाषागत ज्ञानमा समेत समस्या नरहेको बताउनुभयो । कक्षा १ देखि १२ सम्म झन्डै एक हजार भन्दा बढी विद्यार्थी संख्या रहेको उल्लेख गर्नुभयो ।
विद्यार्थीलाई गुणस्तरीय शिक्षा प्रदान गराउन आफू निरन्तर लागिरहेको समेत जिकिर गर्नुभयो । आजको परिवर्तनकारी भूमिकामा शिक्षाको महत्त्वपूर्ण स्थान रहेको बताउदै पौडेलले शिक्षालाई व्यवहारिक ज्ञानसंग जोड्न आह्वान समेत गर्नुभयो ।
कार्यक्रममा शिक्षक, विद्यार्थी, अभिभावक तथा विभिन्न क्षेत्र तथा संस्थामा आबद्ध सामाजिक व्यक्तित्वको सहभागीता थियो ।