खगेरी सिंचाईं जल उपभोक्ता संस्था भरतपुर १४ शिवनगरको २२ औं बार्षिक साधारणसभा सम्पन्न भएको छ ।
खगेरी सिंचाई जल उपभोक्ता संस्थाका अध्यक्ष बेलबहादुर गुरुङको अध्यक्षतामा भएको कार्यक्रममा बागमती प्रदेशका उर्जा तथा जलस्रोत मन्त्री श्यामबहादुर खड्काको प्रमुख आतिथ्यता रहेको थियो ।
कार्यक्रमलाई सम्बोधन गर्नुहुँदै मन्त्री खड्काले खगेरी सिंचाईलाई व्यवस्थित गराउन आफू प्रतिबद्ध बनेको जिकिर गर्नुभएको छ ।
उहाँले नारायणी लिफ्टलाई प्रयोग गरेर खगेरी सिंचाईलाई आम उपभोक्ता सामु पुराउनुपर्ने बताउनुभयो ।
चितवन खेतीपातीका लागि उर्वरशिल भूमि भएको स्मरण गर्दै मन्त्री खड्काले प्रदेशबाट छुट्टाइने रकम खगेरी सिंचाइ निर्माण र व्यवस्थापनका लागि बिनियोजन गर्ने प्रतिबद्धता समेत जाहेर गर्नुभयो ।
चितवन जिल्लाको पश्चिमी क्षेत्र साविक गीतानगर देखि बखानपुर शारदानगरसम्मको समतल उर्वर भूमि करिव ३९०० हेक्टर खेतीयोग्य जमिनलाई सिंचाइ सुविधा उपलब्ध गराई कृषिमा आधारित किसानहरुको जीवनस्तर वृद्धि विकास गर्ने उद्देश्यले सो सिंचाई लागू गराइएको हो ।
सोही अनुसार राप्तीदुन सिंचाइ योजना (खगेरी नहर) तर्जुमा गरी २०१६ सालमा तत्कालिन प्रधानमन्त्री बिपि कोइरालाबाट शिल्यन्यास भई २०१७ साल आषाढ १४ गतेबाट नहर निर्माणका लागि सर्भे, डिजाइन गरी रु. ७४ लाख ६५ हजारको लागत इष्टिमेटमा २०१९ साल देखि शुरु गरी २०२४ साल आषाढ मसान्तमा सम्पूर्ण कार्य पूरा गरी टिकौली देखि मंगलपुरसम्म २२.५ कि. मी. मूल प्रणाली (हाल ५ कि. मी. थप गरी शारदानगर हेल्थपोष्टसम्मको) २७.५ कि.मी. कायम गरिएको छ । ९ वटा शाखा र ४ वटा प्रशाखाहरु करिव १०० कि. मी. तयार भएको थियो। यसरी निर्माण सम्पन्न पछि २०२४ साल श्रावण महिनावाट पानी सचालन गरिएको थियो भने २०२६ साल जेष्ठ १६ गते तत्कालिन जलस्रोत मन्त्री श्री रुद्र प्रसाद गिरीज्यूबाट साविक ११ वटा गा.वि.स. गीतानगर, शिवनगर, पटिहानी, जगतपुर, पार्वतीपुर, शुक्रनगर, फूलबारी, मंगलपुर, शारदानगर, गुञ्जनगर, दिव्यनगर (हाल भरतपुर म.न.पा. का ६, १३, १४, २२, २३, २१, १९, २०, १५, १७, २५ र रत्ननगर न.पा. को वडा नं. ९ कपरफोरीलाई सिंचाइ सेवा पुऱ्याउने उद्देश्यले उद्घाटन भएको थियो।
कार्यक्रममा बोल्ने उपभोक्ताहरुले खगेरी सिंचाईलाई व्यवस्थित गर्दै नारायणी लिफ्टको पानी खगेरीमा संचालन गर्नुपर्ने धारणा राखेका थिए ।