साहित्य संगम चितवनको आयोजनामा संस्मरणकार लीलाधर पौडेलको पुस्तक अन्तिम रातको आज बिमोचन गरिएको छ ।
साहित्य संगम चितवनका अध्यक्ष प्रकाश चापागाईंको अध्यक्षतामा भएको सो कार्यक्रममा वरिष्ठ लेखक तथा समालोचक इन्द्र प्रसाद रेग्मीको प्रमुख आतिथ्यता रहेको थियो ।
बि.स. २०१२ सालमा बिचौर, तिलबारी, लमजुङमा जन्मनु भएका लेखक लीलाधर पौडेलले हालसम्म ३ वटा कृति प्रकाशनमा ल्याउनुभएको हो । अन्तिम रात, उपचार उपन्यास र लखेटिएको जिन्दगी उपन्यास प्रकाशनमा ल्याउनुभएको हो । लेखक पौडेलको अन्तिम रात पुस्तकमा २१ वटा संस्करण र १४० पृष्ठ रहेका छन् । उक्त पुस्तक बिमोचन कार्यक्रममा प्रमुख अतिथिका रूपमा बोल्दै वरिष्ठ लेखक एवं समालोचक इन्द्र प्रसाद रेग्मीले यथार्थ र बस्तुगत घट्नासंग केन्द्रित रहेर लेखकको मनोभाव अन्तिम रात कृतिमा समाबेश भएको बताउनुभयो । त्यस्तै उहाँले लेखक पौडेलले लेखेको पुस्तकमा आफ्नो परिवारको मनोबाद दर्शाएको जिकिर गर्नुभयो । त्यस्तै वरिष्ठ साहित्यकार डिआर पौडेलले अन्तिम रात कृतिले अतितका स्मरणहरुलाई झकझकाउने बताउनुभयो ।
त्यस्तै पुस्तकका बारेमा बोल्नुहुँदै शिक्षाविद् रमाकान्त सापकोटाले लीलाधर पौडेलद्वारा लेखिएको अन्तिम रात कृति नवीनतम कृति भएको उल्लेख गर्नुभयो । लेखक पौडेलको संस्मरण सत्य घटनामा आधारित आफ्नो जीवन कथा भएकाले सबैका लागि प्रेरणा र उर्जाको स्रोत बन्ने बिश्वास व्यक्त गर्नुभयो ।
अन्तिम रात पुस्तकका लेखक लीलाधर पौडेल सेवा निवृत्त शिक्षक एवं अमर माध्यमिक विद्यालय पटिहानीको पूर्व शिक्षक समेत हुनुहुन्छ ।