‘नेपाल आइडल’ पाँचौँ संस्करणको उपाधि बर्दियाका करण परियारले जितेका छन् ।

प्रतिस्पर्धात्मक गायन कार्यक्रम ‘नेपाल आइडल’ काे शनिबार साँझ सम्पन्न अन्तिम प्रतिस्पर्धामा मोहित भुजेल, सलोमी गुरुङ र सचिन विश्वकर्मालाई दर्शकबाट प्राप्त मतका आधारमा पछि पार्दै करणले उपाधि जितेका हुन् ।

विजेता परियारले नगद २५ लाख रुपैयाँसहित अन्य उपहार प्राप्त गरे । प्रतियोगितामा पोखराकी सलोमी गुरुङ दोस्रो भइन् । उनले १० लाख रुपैयाँ पाइन् । त्यस्तै तेस्रो भएका दार्जीलिङका सचिन विश्वकर्माले ५ लाख रुपैयाँ पाए । त्यस्तै चौथो स्थान हात पारेका दार्जीलिङकै मोहित भुजेलले स्कुटर पाए ।