चितवन जिल्ला दुग्ध उत्पादक सहकारी संघका अध्यक्ष किशोर बगालेले अझैपनि किसानले दुधको भुक्तानी नपाएको गुनासो गर्नुभएको छ ।
पारदर्शी अनलाइन डटकमसंग संक्षिप्त कुराकानी गर्नुहुँदै बगालेले ८० करोड भुक्तानी नपाएको बताउनु भएको हो ।
दैनिक १ लाख ५१ हजारको दुध बिक्री गर्दै आइरहेको चितवन जिल्ला दुग्ध उत्पादक सहकारीले राज्यका सबै निकायमा हारगुहार गर्दापनि आफूहरुले न्याय नपाएको गुनासो गर्नुभयो ।
किसानले सरकारी रेट अनुसार, प्रतिलिटर ६५ रुपैयाँ पाउने प्राबधान छ । १५/१५ दिनमा किसानले पाउनुपर्ने दुधको रकम समयमा नै पाउन नसक्दा दुध आयातमा समस्या देखिएको हो ।
त्यस्तै दुग्ध उत्पादक किसानहरुका लागि बजारीकरणको समस्या हुँदा किसानहरु पलायन हुनुपर्ने अवस्था सिर्जना भएको र अनुदान समेत शुन्य हुँदै गएको बगालेको भनाइ छ ।
आफूहरुले दुग्ध उत्पादक किसानहरुका समस्याका बारेमा बारम्बार स्थानीय, प्रदेश र केन्द्र सरकारको ध्यानाकर्षण गराउदा समेत सरकारले कुनै चासो नदेखाएको बगालेले जानकारी दिनुभयो ।
दुधको बजारीकरण सहज रूपमा गर्नुपर्ने, दुधको भुक्तानी समयमा नै हुनुपर्ने, सहुलियत ऋण सुलभ तरिकाले किसानहरूले प्राप्त गर्ने बाताबरण बनाउनुपर्ने, बिमामा देखिएको समस्याको सहजीकरण गर्नुपर्ने र बागमती प्रदेश सरकाबाट दिदै आएको दुध उत्पादनमा आधारित अनुदान रकम सबै दुग्ध किसानले सहजै प्राप्त गर्नुपर्ने जस्ता मागहरू सरकार समक्ष राखिदै आएको बगालेले बताउनुभयो ।