नेपाल सरकारका कृषि तथा पशुपंछी बिकास मन्त्री रामनाथ अधिकारीले छिट्टै कृषि ऐन कार्यान्वयन हुन लागेको बताउनुभएको छ ।
चितवन उद्योग संघ र चितवन जिल्ला दुग्ध उत्पादक सहकारी संघको संयुक्त आयोजनामा आजदेखि संचालित प्रथम राष्ट्रिय डेरी एक्स्पो २०८१ लाई सम्बोधन गर्नुहुँदै मन्त्री अधिकारीले सो कुरा बताउनुभएको हो ।
देश आर्थिक संकटमा गुज्रिएको बेला कृषि क्षेत्र झनै बिकराल बन्दै गएको मन्त्री अधिकारीले बताउनुभयो । किसानले अझैपनि दुधको भुक्तानी नपाएकोमा आफू चिन्तित बनेको अधिकारीको भनाइ छ । कृषिलाई व्यवहारिक र सैद्धान्तिक बनाउनुपर्नेमा उहाँले जोड दिनुभयो ।
आम किसानका समस्यालाई सम्बोधन गर्ने गरि अब बन्ने कृषि ऐनले देशभरका किसानलाई समेट्ने बताउनुभयो । सम्भावित खेतीयोग्य जमिनको खोजी गर्दै युवा पलायनको बढ्दो संख्यालाई रोक्न सकिने मन्त्री अधिकारीले धारणा राख्नुभयो ।
नेपालमा बिगतको निर्वाहमुखी कृषिलाई स्मरण गर्दै मन्त्री अधिकारीले आजको २१ औं शताब्दीमा आधुनिक प्रणालीद्वारा खेती हुने गरेको बताउनुभएको छ ।
आफ्नो कार्यकालभित्र समयमा नै दुग्ध किसानलाई भुक्तानी दिलाउन र आम किसानलाई समयमा नै मल, बीउ, कृषि सामाग्री तथा उपकरण प्रदान गर्ने लक्ष्य रहेको बताउनुभयो ।
देशलाई कृषिमा आत्मनिर्भर बनाउन सकिएको खण्डमा मात्र आर्थिक चलायमान गराउन सकिने धारणा राख्नुभयो । चितवन कृषिका लागि ठूलो सम्भावना भएको क्षेत्र भएको उल्लेख गर्दै मन्त्री अधिकारीले हाल संचालित एक्स्पोले आम किसानका समस्या समाधान गर्ने बिश्वास लिनुभयो ।