सरकारी स्वामित्वको दुग्ध विकास संस्थान डीडीसी र निजी डेरीकै प्रतिनिधिहरूले दुधकाे नियमित भुक्तानी दिने विषयमा अनविज्ञता प्रकट गरेका छन् ।
चितवनको भरतपुरमा जारी ‘पहिलो राष्ट्रिय डेरी एक्स्पो’ मा शनिबार गरिएको प्यानल छलफलमा बोल्ने धेरै वक्ताले यस विषयमा अनविज्ञ रहेकाे आशय प्रकट गरेका हुन् ।
त्यस्तै, छलफलमा सहभागी दुग्ध विकास संस्थानका निमित्त उप-महाप्रबन्धक राजेन्द्रप्रसाद अधिकारीले सरकारबाट ऋण अनुदान नलिइ किसानको पैसा तिर्ने अवस्था नरहेको बताउनुभयाे । ‘हामीले सरकारबाट ऋण पाए वा स्टक विदेश तथा स्वदेशमा बिक्री गर्न सकेमात्र किसानलाई रकम भुक्तानी गर्न सक्नेछौं ।’ उहाँले भन्नुभयाे ।
यसैगरी, डेरी उद्योग संघका अध्यक्ष राजकुमार दाहाल र नेपाल डेरी एसोसिएसनका अध्यक्ष प्रल्हाद दाहालले किसानको सबै बक्यौता भुक्तानी दिन हालको अवस्थामा सम्भव नभएको स्वीकार गर्नुभयाे ।
राष्ट्रिय दुग्ध विकास बोर्डका कार्यकारी निर्देशक डा. राजेन्द्रप्रसाद यादवले किसानको भुक्तानीका लागि समन्वय र सहकार्य गर्दै आएको बताउनुभयाे ।
यसैगरी कृषि मन्त्री रामनाथ अधिकारीले आँफु मन्त्री हुनु अगाडि ११ महिनाको किसानको भुक्तानी वाँकी रहेको र हाल किसानले उक्त भुक्तानी पाइसकेको दाबी गर्दै भदौ देखि माघ सम्मको भुक्तानी किसानलाइ दिन मन्त्रालयले आवश्यक व्यवस्थापन गरिरहेको बताउनुभयाे ।
डेरीमा प्रविधि, अर्थतन्त्रमा समृद्धि’ भन्ने नारासहित चितवन उद्योग संघ र चितवन जिल्ला दुग्ध उत्पादक सहकारी संघको आयोजनामा संचालन भएको एक्स्पो आइतबारसम्म संचालन हुनेछ । प्रदर्शनीमा डेरी तथा पशु आहार उद्योगमा आवश्यक मेसिनरी तथा उपकरण, डेरी सफ्टवेयर, डेरीका विभिन्न उत्पादन, दूध सहकारी, पशुपालनका सामग्री, आहारा, औषधि, डेरी प्याकेजिङ उद्योगका करिब सय स्टल छन् ।