अखिल नेपाल शिक्षक संगठन चितवनका अध्यक्ष एवं केन्द्रीय सदस्य हिरामणि चापागाईंले विद्यालय शिक्षा ऐन जारी नभएसम्म आन्दोलन नरोकिने बताउनुभएको छ ।
पारदर्शी संवादमा संक्षिप्त कुराकानी गर्नुहुँदै चापागाईंले सो कुरा बताउनुभएको हो ।
पटकपटक सरकारको ध्यानाकर्षण गराउदा समेत सरकारले नसुनेपछि आफूहरु बाध्य भएर आन्दोलन गर्नुपरेको चापागाईंले गुनासो गर्नुभयो ।
त्यस्तै चापागाईंले शिक्षकका माग यदि सरकारले सम्बोधन नगरेको खण्डमा सरकारका कुनैपनि गतिविधि आदिमा सहयोग नगर्ने, एक सुत्रीय माग पुरा नगरे आउँदो चुनावमा पछार्ने, शिक्षकका विरुद्धमा उत्रने तथा अभिव्यक्ति दिने नेतालाई चुनावमा हराएरै छाड्ने चेतावनी दिनुभयो ।
उता काठमाडौंमा आजपनि विद्यालय शिक्षा ऐन जारी गर्न माग गर्दै शिक्षकहरुले प्रदर्शन जारी राखेका छन् ।
पछिल्लो २० दिनदेखि शिक्षकहरु काठमाडौंको माइतीघर मण्डलामा आन्दोलनरत छन् । शिक्षामन्त्री, सभामुख, प्रधानमन्त्रीसँग समेत छलफल गरे पनि निष्कर्ष नआएपछि शिक्षकहरुले आन्दोलन जारी राखेका हुन् ।
विद्यालय शिक्षा ऐन जारी नभएसम्म आन्दोलन जारी रहने शिक्षकहरुको अडान छ । आन्दोलनमा सहभागी शिक्षकहरुले कक्षा १२ को परीक्षा वैशाख ११ गतेदेखि शुरु हुने र यसमा पनि शिक्षकहरु समावेश नहुने जानकारी दिएका छन् ।
राज्यले आफूहरुका माग छिटो सम्बोधन गर्नेमा आशावादी रहेको आम शिक्षकहरुको भनाइ छ । शिक्षकहरुले शनिबारसम्म बिहान ११ बजेदेखि अपरान्ह ४ बजेसम्म आन्दोलन गर्दै आएकोमा आइतबारबाट भने बिहान ९ देखि १२ बजेसम्मलाई समय परिवर्तन गरेका छन् ।