अन्तर्राष्ट्रिय युवा दिवसको अवसर पारि माडी जेसीज र युथ भोलन्टियर ग्रुपको संयुक्त आयोजनामा युवा र जलवायु न्यायबारे एक दिने अन्तरक्रियात्मक कार्यक्रम आज (मंगलबार) सम्पन्न भएकाे छ ।
“दिगो विकास र सुनौलो भविष्यको सार, स्थानीय सहभागिता समृद्धिको आधार” भन्ने मूल नारा सहित सञ्चालित कार्यक्रममा होप फर चिल्ड्रेनको सह-आयोजना तथा चितवन साक्रिय महिला फाउन्डेशनको सहयोग रहेकाे थियाे ।
माडी–३ बसन्तपुरस्थित माडी नगरपालिका कृषि शाखाकाे सभाहलमा सम्पन्न कार्यक्रममा माडीका ३५ जना युवाहरूको सहभागिता रहेकाे थियाे । कार्यक्रममा सप्तगण्डकी बहुमुखी क्याम्पसका उप–प्राध्यापक ध्रुव आचार्य र राजनीतिशास्त्र तथा कानुनका विद्यार्थी र बिक्रम सुनारले प्रशिक्षण दिनुभएकाे थियाे ।
तालिममा सहभागीहरूले दिगो विकासका लक्ष्यहरूलाई आत्मसाथ गर्दै जलवायु परिवर्तन, वातावरण संरक्षण, कृषि तथा खाद्य सुरक्षा, पानीका स्रोत र उर्जा उत्पादन, जैविक विषादीको प्रयोग, र जलवायुमैत्री कृषि प्रवर्द्धनजस्ता विषयमा प्रशिक्षित भएकाे माडी जेसीज वर्ष २०२५ का शाखा अध्यक्ष जेसी ईश्वर रानाभाटले जानकारी दिनुभयो । #PRD820427