भरतपुर महानगरपालिका–१ देवघाटधामस्थित नयाँ विद्युतीय शवदाह गृह मंसिर १६ गतेदेखि औपचारिक रूपमा सेवा सञ्चालनमा आउने भएको छ।

महानगरपालिकाको वातावरण तथा विपद् व्यवस्थापन महाशाखाले सार्वजनिक सूचना जारी गर्दै वातावरणमैत्री दहन सेवा उपयोग गर्न सबैलाई आग्रह गरेको छ।

सेवा लिँदा मृतकको विवरण, परिचयपत्रका प्रतिलिपि, अस्पताल मृत्यु प्रमाणपत्र वा आवश्यक कागजात अनिवार्य रहनेछ। प्रति शव रु ३५०० शुल्क तिरी दर्तापछि मात्र दहन प्रक्रिया सुरु गरिने सूचनामा उल्लेख छ। आवश्यक बास/काठका भाटा मृतकका आफन्तले स्वयं व्यवस्था गर्नुपर्नेछ।

शवदाह गृह बिहान ५ बजेदेखि बेलुकी ८ बजेसम्म सञ्चालन हुनेछ। दहनपछि माग अनुसार अस्तु उपलब्ध गराइनेछ। साथै परिसरमा सरसफाइ तथा निजी सामानको सुरक्षा आफन्त स्वयंले गर्नु पर्ने महानगरले जनाएको छ ।