प्रधानमन्त्री कृषि आधुनिक परियोजना केन्द्रद्वारा चितवनका कृषकहरुले लगायका विभिन्न बालीहरुको अनुगमन गरिएको छ ।
कृषि सहकारी तथा प्राकृतिक स्रोत समितिका सदस्य एवं माननीय बिरबहादुर बलायरको नेतृत्वमा चितवनका विभिन्न क्षेत्रमा लगाइएका बालीहरुको अनुगमन गरिएको हो । अनुगमनका क्रममा कृषकहरुले राखेका समस्या र गुनासोहरुको संबोधन गर्दै बलायरले किसानका समस्या समाधान गर्न आँफू सधैं प्रतिबद्ध भएको बताउनुभएको छ । किसानहरुले लगाउदै आएका विभिन्न अन्नबालीहरुको स्थलगत अध्यन गर्दै बलायरले बजारको सुनिश्चितता गराउन र किसानलाई सहुलियत दरमा ऋण प्रदान गराउन राज्यलाई तत्पर बनाउने जिकिर गर्नुभयो ।
त्यस्तै केरा तथा धानबाली गरिरहेका किसानहरुले आफ्नै बारीमा उत्पादन गरेका केरा तथा अन्य बालीहरुले राम्रो बजार भाउ नपाएको र उत्पादन भएका बस्तुहरु बजारसम्म पुराउन असहज भएको गुनासो गरेका थिए । मल लिनको लागि अझैपनि घण्टाैंसम्म लाइनमा बस्नुपर्ने किसानहरुको दुखेसो थियो । रत्ननगर र माडीका किसानहरुले उत्पादन गरेका तरकारीबारी, केरा, चैते धान र स्टेबरी खेतीको समेत अनुगमन गरिएको हो । सो अनुगमन कार्यक्रममा कृषि सहकारी तथा प्राकृतिक स्रोत समितिका पदाधिकारी र प्रतिनिधिसभाका सदस्य लगायत कृषकहरुको सहभागीता रहेको परियोजना कार्यान्वयन एकाई, चितवनका प्रमुख महेश रेग्मीले बताउनुभयो ।
अहिले केराको जोन क्षेत्र रहेका कालिका, खैरहनी, राप्ती, माडी र रत्ननगर लगायतका क्षेत्रहरु हुन् । जिल्लामा ७५० कृषकले व्यवसायिक रुपमा केरा खेती गरेको अनुमान छ । मालभोग केराको स्वाद मिठो र उत्पादन बढी हुने भएकाले अधिकांश कृषकको रोजाइमा मालभोग जात नै पर्ने गरेको कृषि अधिकृत ढुङ्गानाले बताउनुभयो ।