माडी नगरपालिकाको नगरप्रमुख ताराकुमारी काजी महतो, नगर उपप्रमुख खेमप्रसाद महतो, प्रमुख प्रशासकिय अधिकृत देखि योजना शाखा प्रमुख शिव प्रसाद सुवेदि लगायत विभिन्न पदाधिकारी तथा कर्मचारीले अदृश्य कमिशन लिएको तथ्य सार्वजनिक भएको छ ।
माडी नगरपालिका भित्र सञ्चालित परियोजना, कार्यक्रम, अपाङ्ग परिचय पत्र वितरण देखि मातृ तथा नवशिशु कार्यक्रम लगायत विभिन्न कार्यक्रम तथा परियोजनाबाट कमिशन रकमलाई अनुगमन भत्ता जस्ता शिर्षकहरुमा तोडमोड गरि कमिशन लिएकाे तथ्य सार्वजनिक भएको हो ।
आर्थिक वर्ष २०७९/८० को महालेखा परिक्षकले सार्वजनिक गरेको अन्तिम लेखापरिक्षण प्रतिवेदमा बेरुजु रकम रु १ करोड ४६ लाख ५६ हजार ३७७ नियमित गर्नुपर्ने तथा १ करोड १ लाख २४ हजार ७६१ रुपैयाँ असुल गर्नुपर्ने (लिएको रकम फिर्ता गर्नुपर्ने) उल्लेख गरेको छ ।
मातृ तथा नवशिशु कार्यक्रममा कमिशन:
मातृ तथा नवशिशु कार्यक्रम अन्तर्गत विभिन्न स्वास्थ्य संस्थामा २०८० जेष्ठ २३ गतेदेखि असार १ गतेसम्म एम.एन.एच. (MNH) अनसाइट कोचिङ तथा अभिमुखिकरण कार्यक्रमको अनुगमन गरेको भनि २०८० असार ६ मा भौचर नं. ४१० बाट नियममा व्यवस्था नभएको अनुगमन भत्ता फिर्ता गर्नुपर्ने महालेखा परिक्षकको प्रतिवेदनले जनाएको छ ।
मातृ तथा नवशिशु कार्यक्रममा कमिशन लिनेको नामवलीःनगर प्रमुख ताराकुमारी काजी महतो रु ६,००० , नगर उपप्रमुख खेमप्रसाद महतो रु ६०००, प्रमुख प्रशासकिय अधिकृत शेषकान्त पौडेल रु ९०००, जनस्वास्थ्य शाखा अ. भोजराज खनाल रु १०,५००, टंकप्रसाद बसेल रु १०,५०० र लेखापाल विश्वज्योति कोइराला रु ७५०० ।
(माडी नगरपालिकाको उल्लेखित प्रतिनिधिहरु जाँदै नगएको अनुगमनमा समेत फाइल सच्याएर अनुगमन भत्ता उल्लेख गर्न माग गरेको आराेप लाग्ने गरेकाे छ ।)