नेपाली राजनीतिमा रामकृष्ण घिमिरे चिरपरिचित नाम हो । वि.स. २००९ सालमा लमजुङमा जन्मनुभएका घिमिरे वि.स. २०२५ सालदेखि नेपाली राजनीतिमा सक्रिय भएर लाग्नुभयो ।

विद्यार्थीकालीन समयमा नेपाली काँग्रेसबाट नै आफ्नो राजनीति यात्रा थालनी गर्नुभएका घिमिरे खासगरी विपिबाट प्रभावित भएर राजनीतिमा लागेको बताउनुभयो । वि.स. २०३० सालमा आफूले पहिलो पटक विपिलाई भेटेको अनुभव घिमिरेले सुनाउनुभयो । विपिलाई स्वागत गरेको भन्दै ३३ सालमा नेता रामकृष्ण घिमिरे जेल पर्नुभयो । तीन बर्ष लामो जेल जीवन बिताएर फेरी उहाँ राजनीतिमा नै लाग्नुभयो । यसै विषयमा हामीले उहाँसंंग गरेको संवाद

यहाँलाई हार्दिक स्वागत छ, पारदर्शी अनलाइन डटकममा ?

धन्यवाद अजित जि !

आराम हुनुहुन्छ ?

आराम छु अजित जि !

आजकल केकाममा बढी व्यस्त हुनुहुन्छ ?

अजित जि ! हामी राजनीतिज्ञ खासगरी सामाजिक तथा राजनीतिक काममा नै बढी व्यस्त  हुनुपर्छ । जुनदिनदेखि म राजनीति यात्रामा पाइला चाले त्यसैदिनदेखि व्यस्त नै छु ।

राजनीति यात्रा तपाईंलाई कस्तो लाग्दैछ ?

अजित जि ! म विद्यार्थी समयमा नै राजनीतिमा क्रियाशिल भएको हुँदा मेरो भित्री मनबाट नै दृढ अठोटका साथ लागेको हुँदा म मेरो राजनीति यात्राप्रति अत्यन्त खुशी छु । विभिन्न आरोह अबरोह झेल्दै पारगर्दै विभिन्न जेलनेल भोग्दै यहाँसम्म आइपुगे यो बीचमा पार्टीको थुप्रै जिम्मेवारी पदमा काम गर्ने सुअवसर समेत प्राप्त गरें । त्यो संगै चितवनको सांसद समेत भए । त्यसैले मेरो राजनीति यात्रा मलाई नराम्रो कहिल्यैं लागेन ।

राजनीतिमा खासगरी तपाईं को बाट प्रभावित हुनुभयो ? फेरी कांग्रेसमा नै किन आबद्ध हुनुभयो ?

म मेरा साथीभाइ, आफन्त, नातागोता सबैबाट प्रभावित भए । त्यो समय सबै कांग्रेसमा हुनुहुन्थ्यो त्यसले झनै प्रभाव पार्यो । फेरी म सबैभन्दा बढी विपिबाट प्रभावित थिए । संयोगले उहाँलाई भेट्ने अबसर समेत मिल्यो । म विपिको शालीनता राजनीतिप्रति उहाँको निष्ठा बुझेर नै राजनीतिमा लागिरहे ।

गिरिजाबाबु र किशुनजीबाट कत्तिको प्रभावित हुनुभयो ?

गिरिजाबाबु र मेरो किशुनजीसंग राम्रो चिनजान र सम्बन्ध थियो । हामी असाध्यै मिल्थ्यौं । किशुनजी असाध्यै त्यागी नेता हुनुहुन्थ्यो । उहाँ पहिले पत्रकारिता गर्नुहुन्थ्यो । बिस्तारै पत्रकारिता हुँदै राजनीतिमा आउनुभयो । यसो भन्दैगर्दा राजनीतिमा गिरिजाबाबुको फेरी देन हैन भन्न खोजेको होइन । उहाँपनि असाध्यै दुरदर्शी नेता हुनुहुन्थ्यो । उहाँको पहलमा जंगलमा भएको माओवादीलाई सत्तामा ल्याउन १२ बुँदे शान्ति सम्झौता समेत गर्नुभयो । गिरिजाबाबु थुप्रै पटक प्रधानमन्त्री हुँदा देशको बिकास निर्माणका लागि धेरै कामहरु भएका छन् । देशमा शान्ति सुव्यवस्था कायम गराउन त्यो समयमा उहाँको अत्यन्त महत्त्वपूर्ण भूमिका छ । उहाँ सधैं देश र जनताको हितको लागि चिन्तन गर्नुहुन्थ्यो ।

तपाईंले विपिलाई पहिलो पटक भेट्दा उहाँ कस्तो हुनुहुन्थ्यो ?

उहाँ अत्यन्त सरल भावको पातलो शरीर, राम्रो जिउडाल, मुसुक्क हासो, राम्रो दारी, नरम बोलीको हुनुहुन्थ्यो । यतिमात्र नभएर उहाँ हत्तपत्त नरिसाउने स्वभावको हुनुहुन्थ्यो । उहाँ डाइनामिक र समाज रुपान्तरणमा जोड दिने खालको व्यक्तित्व हुनुहुन्थ्यो । उहाँको व्यक्तित्वबाट म असाध्यै प्रभावित भए ।

नेपाली कांग्रेसले विपिले देखाएको बाटो पहिल्याउन सकेन भन्ने आरोप छ नि ?

अजित जि ! पक्कैपनि हो । नेपाली कांग्रेसले विपिले देखाएको बाटो पहिल्याउन नसकेकै हो । विपि देश बिकासको सर्वोच्च नेता हुन् । विपिलाई समाज रुपान्तरणमा उनले खेलेको भूमिकाको छुट्टै बिशिष्ट योगदान थियो । प्रजातन्त्र ल्याउन देशमा विपिको ज्यादै ठूलो योगदान छ । तर तात्कालिन समयमा कांग्रेसको नीति तानाशाही थियो भन्ने कुरा चाहिँ गलत हो । देश र जनताकै लागि कांंग्रेसले धेरै कामहरु गरेको छ ।

तपाईंको राजनीति बारे थोरै बुझ्न चाहे ?

अजित जि ! मेरो राजनीति वि.स. २०२५ सालदेखि सुरु भयो । २६ सालमा लमजुङमा बसेर राजनीति गरें । त्यसपछि २८ सालमा चितवन आएर वीरेन्द्र क्याम्पसमा नेविसंघको सभापति भएर काम गरें । त्यो अघि स्वयवियुको अध्यक्ष समेत भएर काम गरेको थिए । यसैगरी वि.स. २०६२/६३ सालको जनआन्दोलनमा म नेपाली कांंग्रका तर्फबाट कमान्डर थिए ।

तपाईंको बुवाआमा के काम गर्नुहुन्थ्यो ?

मेरो बुवाआमा सामाजिक कार्यमा नै आबद्ध हुनुहुन्थ्यो । खेतीकिसान गरेर हामीलाई पढाउनुभयो हुर्काउनुभयो । उहाँहरुको चाहनापनि छोरा असल बनोस् उसको राजनीति यात्रा राम्रो होस् भन्ने नै थियो । फेरी मैले राजनीति यात्रामा भोगेका जेलनेल, तनाव र कुटपिट आदि देखेर छोराले अप्ठ्यारो पेशा रोजेछ भनेर अत्यन्तै पिर गर्नुहुन्थ्यो । तर पछि बिस्तारै मेरो कर्मप्रति खुशी हुँदै जानुभयो ।

तपाईं कति समय जेलमा बस्नुभयो ?

म तीन बर्ष जेलमा बसें । विपिलाई स्वागत गरेको भेटेको भन्दै वि.स. २०३३ सालमा मलाई काठमाडौंबाट गिरफ्तारी गरिएको थियो ।

पहिलेको र अहिलेको राजनीतिमा कत्तिको भिन्नता छ ?

अजित जि ! पहिले र अहिलेमा राजनीतिमा ज्यादै ठूलो भिन्नता छ । पहिले राजनीति सेवा थियो । अहिले राजनीति कमाईखाने भाडो बन्यो । भ्रष्टाचार र बेथिति झनै मौलायो । राजनीतिमा बढी पैसाको चलखेल बढ्यो । जसले गर्दापनि अहिले राजनीति दुर्घन्धित हुँदै गएको छ ।

यहाँ सांसद समेत बन्नुभयो ? त्यो समयमा केके कामहरु भए ?

अजित जि ! म सांसद भएपछि संविधान निर्माण भयो । थुप्रै बिकास निर्माणका कामहरु बनें । धेरै अधुरा कामहरूले पूर्णता पायो । मलाई लाग्छ मेरो कार्यकालमा मैले चितवनमा धेरै काम गरेको छु ।

तपाईंको बिचारमा राजनीति कस्तो हुनुपर्ने हो ?

राजनीति अजित जि ! सेवामुखी हुनुहुपर्छ । जनताको काम गर्न सक्ने सक्षम उम्मेदवार चयन गर्नुपर्छ । यो बिज्ञानको युग हो । धेरै कुराको बिकास भएको छ । त्यसैले समयको माग अनुसार  नेपाली राजनीतिपनि सुधार हुन म जरुर देख्छु ।

अन्त्यमा केही भन्नु छ ?

अजित जि ! धेरै कुराहरू माथी नै आइसकेको छ । राजनीतिमा देखिएका बिकृतीलाई चिर्दै नयाँ चिराबाट अगाडि बढ्नुपर्छ भन्ने हो । अहिले फेरी नयाँ पुस्ता युवाहरुको जमात देशलाई निकासदिन राजनीतिमा आएका छन् । यो गणतन्त्रको सुनौलो उपलब्धि हो । आफ्ना कुरा तथा बिचार राख्न पाउने प्रेस तथा वाक स्वतन्त्रता छ । त्यसैले युवाहरुको बिचारपनि बुझ्न आबश्यक छ । देशका कयौं परिवर्तनकारी भूमिकामा युवाहरुको ज्यादै ठूलो महत्त्वपूर्ण भूमिका छ । म उहाँहरुको योगदानको कदर गर्छु । तर दुख लाग्छ, जुन अभिष्ट बोकेर हामीले गणतन्त्र त ल्यायौं तर यही देशमा सम्भावनाको खोजी गर्दा आज आम युवाहरु पराइको देशमा जान बाध्य छन् । नेपाल सम्भावनाले भरिपूर्ण देश हो । यहाँको हावापानी अत्यन्तै राम्रो छ । कृषि क्षेत्रमा ज्यादै ठूलो सम्भावना छ । यी सबै कुरालाई बुझेर हामीले काम गर्न सक्ने हो भने मलाई लाग्छ यही धेरै काम गर्न सकिन्छ ।

हस् धन्यवाद ! हाम्रो प्रश्नमा आफ्नो बिचार राखिदिनुभएकोमा ?

सर्वप्रथम पहिला अजित जि ! तपाईंलाई धेरैधेरै धन्यवाद ! मलाई तपाईंको लोकप्रिय मिडिया पारदर्शी अनलाइनमा मेरो बिचार राख्ने अबसर दिनुभएकोमा यहाँपनि धन्यवाद !