राष्ट्रिय स्वतन्त्र पार्टी (रास्वपा) की सांसद सोबिता गौतमले पार्टी सभापति रवि लामिछानेमाथि लगाइएको सहकारी ठगीको मुद्दा राजनीतिक प्रतिशोध भएको बताएकी छन्।
संसदीय छानबिन समितिको प्रतिवेदनले नै सहकारीको रकम अपचलनमा लामिछानेको संलग्नता नदेखाएको जिकिर गर्दै उनले सत्ता र शक्तिको दुरुपयोग गरी मुद्दा चलाइएको बताइन्।
शनिबार काठमाडौंमा आयोजित एक कार्यक्रमलाई सम्बोधन गर्दै सांसद गौतमले हस्ताक्षर अभियान रवि लामिछानेलाई छुटाउन नभई रविमाथि भएको अन्यायविरुद्ध जनएकता प्रदर्शन गर्नका लागि भएको स्पष्ट पारिन्।
‘हामीलाई सोध्नुहुन्छ, हस्ताक्षर गरेर रवि छुट्छ र ? छुटाउने-नछुटाउने त तालाचाबी सब तपाईँहरुसँग छ,’ सत्तापक्षलाई लक्षित गर्दै उनले भनिन्, ‘तर जनताले रवि लामिछानेलाई अन्याय भयो भनेर मेरो एउटा हस्ताक्षर गर्छु भन्दा तपाईँहरूलाई केको आपत्ति ?’
उनले सहकारी ठगी प्रकरणमा बनेको संसदीय छानबिन समितिको प्रतिवेदनलाई उद्धृत गर्दै लामिछानेलाई नियोजित रूपमा फसाइएको दाबी गरिन्।