लोककल्याण सेवा प्रतिष्ठानद्वारा संचालित श्रीराम जानकी बालिका आश्रम देवघाटले पौष २६ गते आफ्नो १५ औं वार्षिकोत्सव विविध कार्यक्रम गरि मनाउने भएको छ ।

आश्रमका महासचिव रामेश्वर खनालको अध्यक्षमा आज बसेको बैठकले सो निर्णय गरेको हो । भरतपुर वडा नं. १ क्षेत्रभित्र बालबालिकाका क्षेत्रमा विशेष योगदान पुराएका दुईजना महिला र असक्त जेहेन्दार विपन्न वर्गका एक जना विद्यार्थी बालिकालाई आर्थिक सहयोग गरिने आश्रमकी अध्यक्ष सावित्री टण्डनले जानकारी दिनुभयो ।

मध्याह्न १२ बजेबाट आश्रम परिसरमा हुने कार्यक्रममा सहभागीता जनाउन आश्रम परिवारले सबैमा आह्वान गरेको छ ।

वि.स. २०६८ सालदेखि स्थापना भएको श्रीराम जानकी बालिका आश्रमले बाबुआमा नभएका अनाथ बालिकाहरुलाई शिक्षादिक्षा र पालन पोषण गर्दै आइरहेको छ । हाल आश्रममा ४० जना बालिकाहरु रहेका छन् । सबै बालिकाहरु कथा भागवत प्रवचनमा सक्षम छन् ।

समाजका प्रतिष्ठित व्यक्तिद्वारा दुई महिला र एक बालिकालाई सम्मान गरिने आश्रमका महासचिव रामेश्वर खनालले जानकारी दिनुभयो । यसअघि पनि आश्रमले वार्षिकोत्सवका अबसरमा जेष्ठ नागरिक, महिला तथा बालबालिकालाई सम्मान सहित विविध कार्यक्रम गर्दै आइरहेको थियो ।