प्रेमिल साँझपछि मिसन रेडको आयोजनामा चितवनस्थित नारायणी किनारमा सांगीतिक कन्सर्ट हुने भएको छ।
आउने नेपाली नयाँ वर्षको स्वागत गर्दै यस वर्षको अन्तिम दिनमा हुने सांगीतिक कन्सर्टले नारायणी किनार गुन्जीदैं छ।
संगीतको मार्फतबाट देशभर देखिएको रगत अभाव हटाउन मिसन रेडले सांगीतिक कन्सर्ट गर्न लागेको अभियानका संयोजक अर्जुन अधिकारीले बताए । उनले नयाँवर्षको अघिल्लो दिन हुने कन्सर्ट च्यारिटीका लागि आयोजना गरेको जानकारी दिए।
मिसन रेड अभियान संयोजक अधिकारीका अनुसार कन्सर्टमा युवाहरुमाझ लोकप्रिय कलाकारहरुको बेजोड प्रस्तुति रहनेछ।साथै नेपालकै चर्चित ब्याण्डहरुले समेत विशेष प्रस्तुति दिने उनको भनाई छ।
एस डी ईभेन्ट्स एंड म्यानेजमेन्टले भ्यालेन्टाइन्स डे मा प्रेमील साँझ सांगीतिक कार्यक्रम आयोजना गरेपछि आउने नेपाली नयाँ वर्षमा ‘ मिसन रेड न्यू ईएर इभ कन्सर्ट ‘ गर्न लागेको हो।
गत फाल्गुन २ गते आयोजित प्रेमील साँझमा कलाकारहरु प्रकाश दुतराज,रचना रिमाल,थानेश्वर गौतम र गजलकार प्रदीप रोदनले हजारौं दर्शक झुमाएका थिए।
एस डी फाउण्डेशनले चितवन सहित देशभर देखिएको रगत अभाव हटाउन मिसन रेड अभियान सञ्चालन गरिरहेको छ।अभियान अन्तर्गत विभिन्न रक्तदान कार्यक्रम,रक्तदाता उत्प्रेरणा कार्यक्रम ,सचेतना सहित विविध पहलकदमी हुँदै आएका छन्।
मिसन रेड अभियानले एक वर्षभित्र ५००० पिन्ट रगत संकलन गर्ने, १०००० युवालाई रक्तदान र रगत अभाव व्यवस्थापन सम्बन्धी तालिम प्रदान गर्ने तथा डिजिटल प्लेटफर्म मार्फत ५० लाख मानिसलाई रक्तदानमा उत्प्रेरित गर्ने लक्ष्य लिएको छ ।
हालसम्म अभियानले करिब १५०० पिन्ट रगत संकलन गरिसकेको छ भने रगत व्यवस्थापनका विभिन्न कार्यक्रमहरू सञ्चालन गर्दै आइरहेको छ।