चितवनमा प्रथम अन्तर्राष्ट्रिय नाट्य महोत्सव २०८१ हुने भएको छ । चैत १० गतेदेखि १२ गतेसम्म संचालन हुने सो कार्यक्रम नारायणी कला मन्दिर, नारायणगढमा हुन लागेको हो ।
कार्यक्रममा तरङ्ग नाट्य समूह चितवन, कर्मी चौतारी चितवन र नारायणी कला मन्दिर नारायणगढ प्रमुख आयोजकका रूपमा रहेका छन् ।
त्यस्तै अंकुरम एकेडेमी, गैंडाकोट इङलिस स्कुल, न्यू क्यापिटल कलेज, डवली द स्पेस, ओम शान्ति एकेडेमी र चितौन कचहरी सहआयोजकका रूपमा रहेका छन् । यसैगरी भरतपुर महानगरपालिका र उद्योग वाणिज्य संघ चितवन मुख्य प्रवर्द्धकको रूपमा रहेको छ ।
चितवन जिल्ला भौगोलिक बनावट, प्राकृतिक सुन्दरता र सांस्कृतिक विविधताको केन्द्र भएकाले यहाँको रंगमञ्चीय कलापनि क्रमशः विकसित हुँदै गएको छ । चितवन जस्तो विविध सांस्कृतिक र ऐतिहासिक सम्पदाले भरिएको जिल्लामा विकसित हुँदै गरेको नाट्य परम्परालाई संरक्षण र प्रवर्द्धन गर्न अत्यन्त आवश्यक रहेकाले सो कार्यक्रम आयोजना गरेको कार्यक्रमका संयोजक देवकुमार श्रेष्ठले जानकारी दिनुभयो ।
कार्यक्रममा जापान, इरान, स्पेन, लिधुवानिया, भारत र नेपाल गरी छ देशका पाँच नाटकहरू मञ्चन हुने समेत श्रेष्ठले बताउनुभयो ।
उक्त कला महाउत्सवमा माथि उल्लेखित देशहरूका करिव ४० राष्ट्रिय तथा अन्तर्राष्ट्रिय कलाकारहरूको सहभागिता हुनेछ । कार्यक्रमको झन्डै तीन हजार दर्शकले अबलोकन गर्ने अपेक्षा आयोजकले लिएको छ ।
तीन दिवसीय यस महोत्सवले नेपाली र अन्तर्राष्ट्रिय नाट्यकर्मीहरूलाई एउटै मञ्चमा ल्याई सांस्कृतिक आदान-प्रदानलाई प्रवर्द्धन गर्नुका साथै चितवन जिल्लालाई नाट्य पर्यटनको केन्द्रका रूपमा स्थापित गर्ने लक्ष्य आयोजकले लिएको छ ।
नेपाली समाजमा नाटकको योगदान महत्वपूर्ण रहँदै आएको छ । जसले मनोरञ्जन मात्र होइन, सामाजिक सचेतना र परिवर्तनका लागि बलियो माध्यमको रूपमा काम गर्छ । यही उद्देश्यलाई आत्मसात् गर्दै, महोत्सवले विभिन्न सामाजिक विषयवस्तुमा केन्द्रित नाटकहरू प्रस्तुत गर्नेछ, जसले समाजलाई चेतनामूलक सन्देश प्रवाह गर्नेछ।