राष्ट्रिय प्रजातान्त्रिक युवा संगठन चितवनको अध्यक्षमा शिव लामिछाने चयन हुनुभएको छ ।

शुक्रबार भरतपुरस्थित फोर सिजन पार्टी प्यालेसमा सम्पन्न चितवन जिल्ला अधिवेशनले लामिछानेको अध्यक्षतामा २१ सदस्यीय नयाँ कार्यसमिति चयन गरेको हो ।

उहाँ माडीका युवा अगुवा एवं व्यवसायी समेत हुनुहुन्छ । विद्यार्थीकालीन समयदेखि राजनीतिमा लामिछाने सकृय हुनुहुन्छ ।

राष्ट्रिय प्रजातन्त्र पार्टी (राप्रपा)को भातृ संगठन राष्ट्रिय प्रजातान्त्रिक युवा संगठनको नवगठित समितिको उपाध्यक्षमा मनोज अधिकारी (राजेश) र मोहनीलाल सापकोटा, सचिवमा गोपाल राज पौडेल, सहसचिवमा सुर्य काफ्ले, कोषाध्यक्षमा नितिक श्रेष्ठ चयन हुनुभएको छ । त्यस्तै  सदस्यहरूमा रुक्मागत पोखरेल, संगीता थापामगर लगायतका युवा नेताहरू चयन हुनुभएको हो ।

अधिवेशनमा प्रमुख अतिथि राप्रपाका केन्द्रीय उपाध्यक्ष, पूर्वमन्त्री एवं चितवन क्षेत्र नं. ३ का सांसद विक्रम पाण्डे तथा विशिष्ट अतिथि राप्रपाका केन्द्रीय सहमहामन्त्री तथा बागमती प्रदेशकी पूर्व सांसद रीना गुरुङको उपस्थिति रहेको थियो ।

जिल्ला तथा केही केन्द्रस्तरका नेताहरूको सहभागीता रहेको कार्यक्रममा चितवनका विभिन्न क्षेत्रबाट राप्रपा निकट कार्यकर्ता एवं शुभेच्छुकहरुको उल्लेख्य सहभागीता थियो ।

दर्जनौं भन्दा बढीको संख्यामा अन्य पार्टीमा आबद्ध युवाहरुले पूर्वमन्त्री पाण्डेको हातबाट टिकामाला लगाएर राप्रपा प्रबेश गरेका थिए ।