नेपाली कांग्रेसका केन्द्रीय सदस्य एवं राज्य प्रशासन बिभागका संयोजक गोविन्द भट्टराईले वर्तमान सरकार टिकिरहने बताउनुभएको छ ।
पारदर्शी सम्वादमा आज संक्षिप्त कुराकानी गर्नुहुँदै नेता भट्टराईले सो कुरा बताउनुभएको हो ।
जनता सडकमा उत्रदैमा फेरि नेपालमा राजतन्त्र नफर्किने प्रतिक्रिया दिनुभयो । वर्तमान सरकार सात बुँदे सम्झौता अनुरुप नै टिकेको जिकिर गर्दै उहाँले सरकार चुडिने सम्भावना टरेको स्पष्ट पार्नुभयो ।
बिगतको इतिहासलाई स्मरण गर्दै नेता भट्टराईले आजको दिनमा देशमा कयौं ठूलो परिवर्तन भएको उल्लेख गर्नुभयो । जनताको छोरापनि राष्ट्रपति बन्न पाउने अधिकार अहिलेकै व्यवस्था बमोजिम भएको दाबी गर्नुभयो ।
प्रेस स्वतन्त्रता, बोल्न पाउने अधिकार हिजो नरहेको भन्दै उहाँले यिनै राजा ज्ञानेन्द्रले बिगतमा जनताको सूचना पाउने हकमा अङ्कुश लगाएको आरोप लगाउनुभयो ।
देशको बिकास, सुशासन र समृद्धिका लागि नेता भट्टराईले लोकतन्त्र बाहेक अर्को बिकल्प नभएको भन्दै आम जनतालाई राजतन्त्रको इतिहास बुझ्न जरुर भएको बताउनुभयो ।
निरङ्कुश राजतन्त्रमा समेत बंशजकै हाबी भएकै कारण राजा बन्न विभिन्न षडयन्त्र रचिएकाले त्यो समयमा पनि देशको बिकास हुन नसकेको बताउनुभयो ।