चितवन उद्योग संघको आयोजनामा चैत्र १४ गतेदेखि आयोजना गरिएको नवौं अन्तर्राष्ट्रिय औद्योगिक प्रदर्शनी–२०८१ को एक विशेष कार्यक्रमका बीच समापन गरिएको छ ।
चितवन उद्योग संघका कार्य बाहक अध्यक्ष मदन घिमिरेको अध्यक्षतामा सम्पन्न प्रदर्शनीमा चितवन उद्योग संघका संस्थापक अध्यक्ष दिलबहादुर ताम्राकार प्रमुख अतिथि रहनुभएको थियो ।
कार्यक्रममा व्यापार तथा निकासी प्रबर्द्धन केन्द्रका अधिकृत जयन्द्र बोगटीले प्रदर्शनी निकै फलदायी भएको बताउनुभयो । बोगटीले यस्ता प्रदर्शनीहरुका माध्यमबाट स्थानीय उत्पादनको बिक्री वितरण र बजारीकरणमा टेवा पुराउने बताउनुभयो ।
त्यस्तै प्रदर्शकहरुको तर्फबाट बगान अर्गानिक टिका सञ्चालक राम चौहानले प्रदर्शनी निकै फलदायी भएको र आगामि दिनहरुमा यस्ता खाले प्रदर्शनीहरु हुनुपर्ने बताउनुभयो । प्रदर्शनीको समापन अवसरमा चितवन उद्योग संघले नववर्ष २०८२ को अवसरमा तयार पारेको भित्तपात्रो (क्यालेण्डर) को समेत विमोचन गरिएको थियो ।
प्रदर्शनीमा अवलोकनकर्ताहरुतर्फ उदय अधिकारी र सरिता श्रेष्ठ र प्रदर्शकहरुको तर्फबाट माडी कोशेली घरले लक्की ड्र मार्फत पुरस्कार जितेका थिए ।
चितवन उद्योग संघका कार्यवाहक अध्यक्ष मदन घिमिरेले स्वागत मन्तव्य राख्नुभएको कार्यक्रममा प्रदर्शनीमा सहयोग गर्ने विभिन्न पार्टनरहरुलाई प्रशंसा पत्र र प्रदर्शकहरुलाई प्रमाण पत्र वितरण गरिएको थियो ।
पाँच दिनसम्म सञ्चालन भएको प्रदर्शनीमा २३ हजार २ सयले अवलोकन गरेका थिए । चितवन उद्योग संघका प्रशासकीय अधिकृत गोविन्द प्रसाद पौडेलले सञ्चालन गर्नुभएको समापन कार्यक्रमलाई चितवन उद्योग संघका उपाध्यक्ष गोपाल प्रसाद गैरेले धन्यवाद मन्तव्य सहित नवौं अन्तर्राष्ट्रिय औद्योगिक प्रदर्शनीको समापन भएको घोषणा गर्नुभएको थियो ।