नेपाल मगर संघ केन्द्रीय निर्वाचन समिति संयोजक सिद्धान्त थापा मगरले जातीय पहिचान सहित संस्कृतिको संरक्षणमा जोड दिनुपर्ने बताउनुभएको छ ।
नेपाल मगर संघ देवघाटले आयोजना गरेको नयाँ बर्ष २०८२ को शुभकामना आदानप्रदान कार्यक्रममा बोल्नुहुँदै उहाँले सो कुरा बताउनुभएको हो ।
धार्मिक एकता र सद्भावको खाँचो भएको उल्लेख गर्दै एकापसमा भातृत्व सहितको आत्मियता बढाउनुपर्ने तर्क गर्नुभयो ।
नेपालभर मगर जातीको बाहुल्यता रहेको जिकिर गर्दै थापा मगरले निकट समयमा सङ्ग्राहालय स्थापनाको लागि समेत जोड दिइएको उल्लेख गर्नुभयो ।
विभिन्न जातीको बाहुल्यता भएको क्षेत्रमा ती जातीका भाषालाई सरकारी र स्थानीय कामकाजमा मान्यता दिनुपर्ने धारणा राख्नुभयो ।
मगर जातीको इतिहासलाई स्मरण गर्दै उहाँले परापूर्वकालमा पुर्खाहरुले पुराएको योगदानको सबैले कदर गर्नुपर्ने तर्क गर्नुभयो ।
मौलिक संस्कृतीको संरक्षणमा मगर जातीको आफ्नै बिशिष्ट योगदान रहेको तर्क सहित भेषभुषा र रितिरिवाजको संरक्षणमा लाग्नु अपरिहार्य भएको बताउनुभयो ।
त्यस्तै उहाँले देशभरी छरिएर रहेका आम मगरबासीहरुमा नयाँ बर्षको शुभकामना प्रदान गर्नुभयो ।
देवघाट गाउँपालिकाका उपाध्यक्ष भुवनसिंह गुरुङले मगर जातीको सङ्ग्राहालय निर्माणको लागि गाउँपालिकाले पहल थालेको बताउनु भएको छ ।
सोही कार्यक्रमलाई बिशिष्ट अतिथिको रूपमा सम्बोधन गर्नुहुँदै गुरुङले सो कुरा बताउनुभएको हो ।
उहाँले मगर गुरुङ तथा अन्य जातीका भाषालाई पनि सरकारी कामकाजको भाषामा प्रयोग गर्न लागिएको बताउनु भयो । स्थानीय शिक्षणबिधिमा समेत सो जातीका भाषालाई छिटै स्थान दिने उहाँको भनाइ थियो ।