चितवन जिल्ला अदालतमा भौतिक संरचना र जनशक्तिको अभाव देखिएको छ । अदालतलाई नयाँ भवन अत्यावश्यक भइसकेको न्यायाधीश ज्ञवालीले बताउनुभयो ।

अहिलेको भौतिक संरचना दुई जना न्यायाधीशको दरबन्दी हुँदा ताकाको भएको भन्दै उहाँले आठ जना न्यायाधीशले काम गर्दै गर्दा पनि नयाँ संरचना बनाउन नसकिएको बताउनुभयो ।

उहाँका अनुसार नयाँ भवन बनाउन ९० करोड रूपैयाँ लाग्ने अनुमान गरी नक्सापास समेत भइसकेको छ । तर, सरकारले बजेट नदिँदा भवन बनाउन नसकिएको उहाँको भनाइ छ ।

अदालतमा ७८ जना कर्मचारीको स्थायी दरबन्दी छ । अदालती कामलाई सहज र छिटोछरितो बनाउन अधिकृतस्तरका १० जना र सहायकस्तरका १० देखि २० जना कर्मचारी आवश्यक रहेको उहाँले जानकारी दिनुभयो ।

‘हामीले संस्थागतरुपमा प्रधानन्यायाधीश, बार अध्यक्षलगायत सबैसँग भवन बनाउन बजेटका लागि पहल गरिरहेका छौँ । तरपनि अहिलेसम्म बजेट पाउन सकिरहेका छैनौं उहाँले भन्नुभयो । हाल सरकारी वकिलको कार्यालयको पुरानो भवनलाई तहसिल शाखा तथा सुरक्षाकर्मी ब्यारेकका रुपमा प्रयोग गरिएको छ ।