पछिल्लोपटक होटल व्यवस्थापनतर्फ विद्यार्थीहरूको आकर्षण बढेको छ। बोस्टन कलेजले शुक्रबार आयोजना गरेको छलफल कार्यक्रममा पनि वक्ताहरुले सो कुरा औंलाएका छन्।
विद्यार्थीहरूले पढ्दा पढ्दै कमाउन सक्ने हुनाले होटल व्यवस्थापन बिएचएमको अध्ययनतर्फ आकर्षण बढ्दै गएको वक्ताहरुको भनाइ थियो ।
बोस्टन कलेजका अध्यक्ष आनन्दबहादुर चन्दले पछिल्लो पटक होटल व्यवस्थापन फस्टाउँदै गएको बताउनुभयो । उहाँले आन्तरिक तथा बाह्य पर्यटकहरूको आगमन बढेको समेत बताउनुभयो ।
विशेष गरेर नेपालका ठूला होटलहरूमा भारतीय र अमेरिकी पर्यटकहरू धेरै आउने गरेको उहाँको भनाइ छ । ठूला होटलहरूले दैनिक २ हजार अमेरिकी डलरको व्यापार गर्ने गरेको बताउनुभएको हो । पढ्दै कमाउँदै गर्न पाउने हुनाले होटल व्यवस्थापनतर्फको अध्ययनमा विद्यार्थीहरूको रुचि बढ्दै गएको अध्यक्ष चन्दले जिकिर गर्नुभयो ।
त्यसैगरी छलफल कार्यक्रममा काठमाडौँको मारियोट होटलका निर्देशक अन्जना पौडेलले देशको आर्थिक वृद्धिदर बढाउन नेपालमा सञ्चालन भएका ठूला होटलहरूको महत्त्वपूर्ण भूमिका रहेको जनाउनुभयो ।
इन्टर्नसिपदेखि पढ्दा पढ्दै कमाउन सकिने हुनाले विद्यार्थीहरूको रोजाई बिएचएमतर्फ बढेको उहाँको भनाइ छ। भरतपुरस्थित मलेवा पार्टी प्यालेसका प्रबन्ध निर्देशक राजदिप ओझाले होटलमा विद्यार्थीहरुलाई इन्टर्नसिपदेखि लिएर ग्राहकहरुलाई विशेष छुटको अवसर दिँदै आएको जानकारी दिनुभयो ।
सुमन पौडेलले सञ्चालन गरेको छलफल कार्यक्रममा गैंडाकोट स्थित मौलाकाली रिसोर्टका प्रबन्धक अरविन्द केसी, सोल्टी रिसोर्ट चितवनका निर्देशक रमेश पाठक, रोयल टुलिप सौराहाका कार्यकारी प्रमुख राजन कुमाल लगायतले भाग लिएका थिए । कार्यक्रममा कलेजले बिएचएम तर्फको अध्ययनको विषयमा वृत्तचित्र पनि प्रस्तुत गरेको थियो ।