भारतीय प्रधानमन्त्री नरेन्द्र मोदी शुक्रबार जापानको राजधानी टोकियो पुगेका छन् ।

प्रधानमन्त्री मोदी दुई देश जापान र चीनको चार दिने भ्रमणमा गएका हुन् । प्रधानमन्त्री मोदीको जापान र चीन भ्रमण यस्तो समयमा भइरहेको छ जब अमेरिकी राष्ट्रपति डोनाल्ड ट्रम्पको व्यापार र भन्सार नीतिका कारण भारत-अमेरिका सम्बन्धमा तनाव उत्पन्न भएको छ।

जापान पुगेपछि प्रधानमन्त्री मोदीले एक्समा लेखेका छन्, भारत र जापानले आफ्नो विकास सहयोगलाई निरन्तर सुदृढ पारिरहेका छन् । म यस भ्रमणको क्रममा प्रधानमन्त्री इशिबा र अन्य नेताहरूलाई भेट्न उत्सुक छु । यसले विद्यमान साझेदारीलाई गहिरो बनाउने र सहयोगका नयाँ तरिकाहरू अन्वेषण गर्ने अवसर प्रदान गर्नेछ।

भ्रमणमा जानुअघि प्रधानमन्त्री मोदीले जापानपछि उनी चीनमा हुने सांघाई सहयोग संगठन बैठकमा भाग लिने जानकारी दिएका थिए । चीनमा मोदीले राष्ट्रपति सी जिनपिङ, रुसी राष्ट्रपति भ्लादिमिर पुटिनलगायत धेरै नेताहरूलाई भेट्ने बीबीसी हिन्दीले जनाएको छ ।