चितवनमा अनुदानको रासायनिक मल वितरण गर्न सुरु गरिएको छ ।
कृषि सामग्री कम्पनी लिमिटेड र साल्ट ट्रेडिङ कर्पोरेसनले स्थानीय तह मार्फत एकसाथ रासायनिक मल वितरण गर्न सुरु गरेका हुन् ।
किसानको माग बमोजिम एक साताअघिदेखि जिल्लामा मल वितरण गर्न थालिएको कृषि सामग्री लिमिटेड भरतपुरका प्रमुख राजन बगालेले जानकारी दिए । ‘यतिखेर धान बालीलाई लक्षित गर्दै अनुदानको युरिया र डीएपी मल वितरण गरिएको छ,’ उनले भने ‘जिल्लालाई पुग्छ कि भन्ने अनुमान गरेका छौँ ।’
आवश्यकता हेरेर पालिकाहरुलाई मल वितरण गरिएको उनले बताए । बगालेका अनुसार, जिल्लामा ८ सय ७९ मेट्रिक टन युरिया र १ हजार ३ सय ७० मेट्रिक टन डीएपी मल वितरण हुँदैछ । ‘हामीकहाँ ४ सय ५१ मेट्रिक टन युरिया र ६ सय ५० टन डीएपी आएको थियो । त्यस्तै साल्ट ट्रेडिङमा ४ सय २८ युरिया र ७ सय १० मेट्रिक टन डीएपी मल आएको थियो । त्यो हामीले जिल्लाका सात पालिकालाई उपलब्ध गराएका छौँ’, बगालेले भने ।
चितवनमा सबैभन्दा बढी भरतपुर महानगरपालिकामा अनुदानको मल वितरण हुँदै आएको छ । यसपटक भरतपुरमा २ सय २६ मेटिकटन युरिया र डीएपी ३ सय १५ मेट्रिक टन वितरण हुँदैछ ।
त्यसपछि माडी नगरपालिकामा यूरिया १ सय ६३, डीएपी २ सय ४०, कालिका नगरपालिकामा युरिया १ सय २०, डीएपी २ सय, खैरहनी नगरपालिकामा युरिया १ सय १५, डीएपी १ सय ९०, रत्ननगर नगरपालिकामा युरिया १ सय १०, डीएपी १ सय ९०, राप्ती नगरपालिकामा युरिया १ सय, डीएपी १ सय ६५ मेट्रिक टन वितरण हुन लागेको छ ।
सबैभन्दा कम इच्छाकामना गाउँपालिकामा युरिया ३० र डीएपी ५० मेट्रिक टन वितरण हुने बगालेले जानकारी दिए । सरकारी स्वामित्वमा रहेका यी दुई कम्पनीले स्थानीय पालिकालाई मल वितरण गर्न दिने गर्दछन् । अनि स्थानीय पालिकाले कृषि सहकारी, समूह, साना किसान, व्यावसायिक फर्म तथा विभिन्न एग्रोभेटमार्फत अनुदानको रासायनिक मल वितरण गर्ने गर्दछ ।