सञ्चार तथा सूचना प्रविधि मन्त्री पृथ्वी सुब्बा गुरुङले सर्वोच्च अदालतको परमादेश र मन्त्रिपरिषद्को निर्णयका आधारमा नेपालमा दर्ता नभएका सामाजिक सञ्जाल बन्द गर्ने निर्णय भएको बताएका छन् ।
बिहीबार मन्त्रालयमा बसेको बैठकले दर्ता नभएका सामाजिक सञ्जाल बन्द गर्ने निर्णय गरेको थियो । आजैदेखि बन्द गर्नका लागि दूरसञ्चार प्राधिकरणलाई निर्देशन दिइएको मन्त्री गुरुङले बताए ।
‘सर्वोच्चको परमादेश, मन्त्रिपरिषद्को निर्णय र दर्ता गर्नका लागि पटक–पटक गरिएको आग्रह अस्वीकार गरेपछि बन्द गर्ने निर्णयमा पुग्यौं,’ मन्त्री गुरुङले भने ।
सरकारको निर्णयानुसार बिहीबार नै प्राधिकरणले दर्ता नभएका सञ्जाल बन्द गर्ने तयारी गरेको छ । फेसबूक, ट्वीटर र युट्युबलगायत झण्डै २ दर्जन सामाजिक सञ्जाल बन्द हुनेछन् । दर्ता भएका टिकटक र भाइबर भने बन्द हुने छैनन् । २ वर्षअघि सरकारले केही समयका लागि टिकटक बन्द गरेको थियो ।