जिल्ला प्रशासन कार्यालय चितवनका प्रमुख जिल्ला अधिकारी गणेश अर्यालले जेनजी आन्दोलनबाट चितवनमा मानवीय क्षति रोक्न सफल भएपनि सार्वजनिक सम्पत्ति रोक्न नसकिएको बताउनुभएको छ ।
प्रशासनले सोमबार पत्रकार सम्मेलन गरेर क्षतिको विवरण समेत सार्वजनिक गरेको हो । प्रर्दशनका क्रममा चितवनमा १४ प्रर्दशनकारी र १२ प्रहरी घाइते भएको र ति मध्ये चारजना अझै उपचाररत भएको जनाएको छ ।
दुई दिनमा प्रहरीले स्थिति नियन्त्रणमा लिन दुई सय राउन्ड रबर गोली, ३ सय ५० सेल अश्रु ग्यास र केही हवाइ फायर गर्नुपरेको बताए । उनले प्रहरीले दुई राउण्ड हवाइ फायर गरेको र गोलीको छर्रा लागेर तीनजना प्रदर्शनकारी घाइते भएको पनि बताए ।
आन्दोलनमा क्रममा २३ भदौमा भरतपुर महानगरपालिकाका उपमेयर चित्रसेन अधिकारीको पार्वतीपुरस्थित घरमा प्रदर्शनकारीले आगजनी गरेका थिए । त्यही बेला ग्याँस सिलिन्डर पड्कदा घाइते किशोरको उपचारका क्रममा निधन भएको पनि प्रशासनले जनाएको छ ।
त्यस्तै रत्ननगर नगरपालिका कार्यालयभित्र आगलागीमा निस्सासिएका एक पुरूषको पनि निधन भएको विवरण आएपनि यसको पुष्टी भइनसकेको प्रजिअ अर्यालले बताए । उनले पहिलो दिन भन्दा दोस्रो दिन अवस्था नियन्त्रण बाहिर पुगेको बताए । उनले भने, मानविय क्षति रोक्न सकेपनि सार्वजनिक सम्पत्तीमा अकल्पनिय क्षति पुग्यो ।