अरनिको राजमार्ग अन्तर्गत धुलिखेल–खावा सडकखण्डको स्तरोन्नतिको काम तीव्रताका साथ पुनः सुरु भएको छ।
रोकिएको विस्तारकार्यका लागि नयाँ निर्माण कम्पनी सि–एन ए–वान काली जेभीसँग गत कात्तिकमा सम्झौता भएपछि १४ महिनाभित्र काम सम्पन्न गर्ने लक्ष्य राखिएको छ।
डिभिजन सडक कार्यालय भक्तपुरका प्रमुख सुमन योगेशका अनुसार रु ३१ करोड ५६ लाखमा ठेक्का सम्झौता भएको हो । पहिलो चरणमा चैतभित्र मुख्य कालोपत्रे कार्य सक्ने र बाँकी काम क्रमशः अघि बढाउने योजना रहेको छ।
पहिलेको ठेक्का पुरा नगरेको गौरी–पार्वती निर्माण सेवासँगको सम्झौता रद्द भएपछि सडक विस्तार कार्य रोकिएको थियो। चार किलोमिटरको उक्त सडकखण्डमा कटिङ, नाली–ड्रेन, बेस र कालोपत्रे गर्ने योजना अनुसार निर्माण अघि बढाइँदैछ।
यो सडक मालवाहक सवारीको भार वहन क्षमताअनुसार बलियो बनाएर १२ मिटर चौडाइको निर्माण गरिनेछ। कार्य समयमा नसकिँदा यात्रु धुलो, हिलो र दुर्घटनाको जोखिममा थिए। नयाँ सम्झौता पछि काम समयमै सम्पन्न गर्ने आशा गरिएको छ।